وائٹ ہاؤس نے تصدیق کی ہے کہ امریکی صدر ڈونلڈ ٹرمپ اتوار کو فیفا ورلڈ کپ 2026 کے فائنل میں شرکت کریں گے، جہاں ارجنٹینا اور اسپین کی ٹیمیں عالمی اعزاز کے لیے مدمقابل ہوں گی۔
وائٹ ہاؤس کی پریس سیکریٹری کیرولین لیویٹ نے جمعرات کو پریس بریفنگ کے دوران کہا کہ صدر ٹرمپ فائنل میچ میں شرکت کے لیے بے حد پرجوش ہیں۔
انہوں نے کہا کہ “ہم اتوار کو ہونے والے فائنل میچ کے منتظر ہیں اور صدر بھی اس تاریخی مقابلے میں شرکت کے لیے پرجوش ہیں۔”
کیرولین لیویٹ کے مطابق ٹرمپ کی موجودگی ایسے ورلڈ کپ کا حصہ ہوگی جسے امریکی تاریخ کا سب سے زیادہ دیکھا جانے والا، انتہائی محفوظ اور کامیاب عالمی فٹبال ٹورنامنٹ قرار دیا جا رہا ہے۔
پریس سیکریٹری سے جب پوچھا گیا کہ صدر ٹرمپ فائنل میں ارجنٹینا یا اسپین میں سے کس ٹیم کی حمایت کریں گے تو انہوں نے کہا کہ انہیں اس بارے میں علم نہیں، تاہم صحافی براہِ راست صدر سے یہ سوال کر سکتے ہیں۔ ان کے بقول، “مجھے یقین ہے کہ صدر اس حوالے سے دلچسپ جواب دیں گے۔”
وائٹ ہاؤس نے مزید بتایا کہ صدر ٹرمپ جمعہ کے روز نیویارک سٹی میں واقع ٹرمپ ٹاور میں فیفا کے استقبالیہ (Reception) میں بھی شرکت کریں گے، جہاں ٹورنامنٹ سے متعلق مختلف سرگرمیوں میں شریک ہوں گے۔
فیفا ورلڈ کپ 2026 کا فائنل اتوار کو نیو یارک-نیو جرسی کے اسٹیڈیم میں کھیلا جائے گا، جہاں دفاعی چیمپئن ارجنٹینا اور اسپین عالمی ٹائٹل کے لیے آمنے سامنے ہوں گے۔
