تہران: ایرانی فوج کے سربراہ جنرل عبدالرحیم موسوی نے کہا ہے کہ ایران کی مسلح افواج شہید رہبرِ اعلیٰ آیت اللہ علی خامنہ ای کے مشن اور نظریات پر پوری قوت کے ساتھ کاربند رہیں گی۔
ایرانی خبر رساں ادارے تسنیم کے مطابق کمانڈر اِن چیف عبدالرحیم موسوی نے اپنے پیغام میں کہا کہ ایرانی قوم اور مسلح افواج شہید سپریم لیڈر کے راستے کو مضبوطی کے ساتھ جاری رکھیں گی اور اسلامی انقلاب کے اصولوں کے تحفظ کے لیے اپنا کردار ادا کرتی رہیں گی۔
انہوں نے شہید رہبرِ اعلیٰ کی آخری رسومات اور جنازے میں بھرپور شرکت کرنے پر ایرانی عوام کا شکریہ ادا کرتے ہوئے کہا کہ عوام کی غیر معمولی موجودگی قومی اتحاد اور انقلاب سے وابستگی کا واضح اظہار ہے۔
عبدالرحیم موسوی نے عوامی شرکت کو تاریخی قرار دیتے ہوئے کہا کہ اس نے ایرانی قوم اور اسلامی انقلاب کے نظریات کے درمیان مضبوط اور اٹوٹ تعلق کو دنیا کے سامنے اجاگر کیا، جبکہ مخالفین کو بھی ایک واضح پیغام دیا ہے۔
ایرانی فوج کے سربراہ نے اس عزم کا اعادہ کیا کہ مسلح افواج ملکی خودمختاری، قومی سلامتی اور انقلاب کے بنیادی اصولوں کے دفاع کے لیے اپنی ذمہ داریاں پوری کرتی رہیں گی۔
