واشنگٹن: امریکی صدر ڈونلڈ ٹرمپ نے آبنائے ہرمز سے گزرنے والے تجارتی جہازوں پر 20 فیصد ٹول ٹیکس عائد کرنے سے متعلق اپنے گزشتہ روز کے اعلان سے پسپائی اختیار کرتے ہوئے کہا ہے کہ وہ نہیں چاہتے کہ اس اہم عالمی بحری گزرگاہ پر کسی بھی ملک سے ٹول یا چارجز وصول کیے جائیں۔
اپنے تازہ بیان میں صدر ٹرمپ نے کہا کہ آبنائے ہرمز میں ٹول ٹیکس لینے کا خیال انہیں پسند نہیں اور ان کی ترجیح یہ ہے کہ خلیجی ممالک ٹول ادا کرنے کے بجائے امریکا میں سرمایہ کاری کریں۔
انہوں نے دعویٰ کیا کہ مشرق وسطیٰ کی قیادت کے ساتھ نتیجہ خیز بات چیت کے بعد اس حوالے سے نئی حکمت عملی اختیار کی گئی ہے، جس کے تحت خلیجی ریاستیں امریکا کے ساتھ بڑے تجارتی اور سرمایہ کاری معاہدے کریں گی۔ ان کے مطابق یہ سرمایہ کاریاں نہ صرف امریکا کی معیشت کو مزید مضبوط کریں گی بلکہ روزگار کے نئے مواقع بھی پیدا ہوں گے۔
صدر ٹرمپ نے کہا کہ تیل کی ترسیل پہلے سے زیادہ مقدار میں جاری ہے اور یہ صورتحال امریکی فوج کی طاقت اور خطے میں اس کے کردار کی بدولت ممکن ہوئی ہے۔ ان کا کہنا تھا کہ آبنائے ہرمز بحری آمدورفت کے لیے کھلی ہوئی ہے، تاہم ایران اس سے فائدہ نہیں اٹھا سکے گا۔
انہوں نے ایرانی قیادت پر شدید تنقید کرتے ہوئے الزام لگایا کہ اس کی پالیسیوں نے ایران کو تباہی کے راستے پر ڈال دیا ہے۔ ٹرمپ نے اعلان کیا کہ امریکا ایرانی بندرگاہوں اور ایرانی کارگو کے خلاف مکمل بحری ناکہ بندی برقرار رکھے گا۔
امریکی صدر نے ایک بار پھر اس عزم کا اعادہ کیا کہ ایران کو کسی بھی صورت جوہری ہتھیار حاصل نہیں کرنے دیے جائیں گے۔ انہوں نے کہا کہ امریکا اپنی قومی سلامتی اور عالمی استحکام کے تحفظ کے لیے ضروری اقدامات جاری رکھے گا۔
یہ پیش رفت ایسے وقت میں سامنے آئی ہے جب برطانیہ اور دیگر بین الاقوامی حلقے آبنائے ہرمز پر ٹول یا اضافی فیس عائد کرنے کی مخالفت کر چکے ہیں اور بین الاقوامی بحری راستے کو آزاد رکھنے پر زور دے رہے ہیں۔
