بحرین کی ایک عدالت نے ایران کے لیے مبینہ جاسوسی اور ایرانی پاسدارانِ انقلاب (IRGC) سے روابط رکھنے کے الزام میں تین افراد کو عمر قید کی سزا سنا دی ہے۔
مناما سے جاری سرکاری بیان کے مطابق بحرینی حکام کا کہنا ہے کہ تینوں ملزمان ایرانی پاسدارانِ انقلاب کے لیے جاسوسی، دشمن عناصر کے ساتھ تعاون، دہشت گردانہ سرگرمیوں میں معاونت اور بحرین کے قومی مفادات کو نقصان پہنچانے کے الزامات میں قصوروار قرار پائے۔
بحرینی حکام کے مطابق ملزمان پر الزام ہے کہ انہوں نے ایرانی پاسدارانِ انقلاب کے ساتھ مبینہ طور پر ملی بھگت کرتے ہوئے ایسی سرگرمیوں میں حصہ لیا جو بحرین کی قومی سلامتی کے خلاف تھیں۔
سرکاری بیان میں مزید کہا گیا کہ ایران اور امریکا کے درمیان حالیہ کشیدگی کے آغاز کے بعد بحرین میں ایرانی پاسدارانِ انقلاب سے مبینہ طور پر منسلک نیٹ ورکس کے خلاف سیکیورٹی اداروں کی کارروائیاں مزید تیز کر دی گئی ہیں اور مشتبہ افراد کے خلاف کریک ڈاؤن جاری ہے۔
بحرینی حکام کا کہنا ہے کہ ملک کی سلامتی اور استحکام کو نقصان پہنچانے والی کسی بھی سرگرمی کے خلاف سخت قانونی کارروائی جاری رکھی جائے گی۔
