اسلام آباد: علامہ اقبال اوپن یونیورسٹی (اے آئی او یو) اور ٹینگ چائنیز انٹرنیشنل ایجوکیشن اینڈ ٹیکنالوجی کے درمیان تعلیمی تعاون کے فروغ کے لیے لیٹر آف انٹینٹ (LOI) پر دستخط کر دیے گئے، جس کے تحت مشترکہ تعلیمی پروگرام، طلبہ و اساتذہ کے تبادلے، چینی زبان کے فروغ، مشترکہ تحقیق، جدید مہارتوں کی تربیت اور جامعات و صنعت کے درمیان روابط کو مضبوط بنانے کے لیے مختلف اقدامات کیے جائیں گے۔
دستخطی تقریب میں یونیورسٹی کی جانب سے وائس چانسلر پروفیسر ڈاکٹر ناصر محمود جبکہ چینی ادارے کی جانب سے بانی سانگ جیاءنگ نے معاہدے پر دستخط کیے۔
تقریب سے خطاب کرتے ہوئے وائس چانسلر پروفیسر ڈاکٹر ناصر محمود نے کہا کہ جدید ٹیکنالوجی اور پیشہ ورانہ مہارتوں سے آراستہ نوجوان ہی مستقبل کی اصل طاقت ہیں، اس لیے جامعات کی ذمہ داری ہے کہ وہ طلبہ کو عالمی معیار کی تعلیم، جدید علوم اور عملی مہارتوں سے لیس کریں تاکہ وہ بدلتی ہوئی عالمی ضروریات کے مطابق مؤثر کردار ادا کر سکیں۔
انہوں نے کہا کہ اس شراکت داری کے تحت جدید ٹیکنالوجی سے استفادہ کرتے ہوئے مہارت پر مبنی تعلیمی پروگرام متعارف کرائے جائیں گے، جن کا مقصد عالمی معیار کی باصلاحیت اور ہنر مند افرادی قوت تیار کرنا ہے۔
وائس چانسلر نے بتایا کہ یونیورسٹی میں ترک، جاپانی اور روسی زبانوں کے مراکز پہلے ہی کامیابی سے کام کر رہے ہیں، جبکہ اس نئے تعاون کے نتیجے میں چینی زبان و ثقافت کا مرکز بھی قائم کیا جائے گا، جو پاکستان اور چین کے درمیان تعلیمی، ثقافتی اور عوامی روابط کو مزید مستحکم بنانے میں معاون ثابت ہوگا۔
انہوں نے اس موقع پر پاکستان اور چین کی دیرینہ دوستی کا ذکر کرتے ہوئے کہا کہ تعلیم دونوں ممالک کے تعلقات کو نئی نسل تک منتقل کرنے کا مؤثر ذریعہ ہے۔
چینی ادارے کے بانی سانگ جیاءنگ نے کہا کہ پاکستان میں ٹیکنالوجی اور مہارت پر مبنی تعلیم کے فروغ کے لیے علامہ اقبال اوپن یونیورسٹی ایک بہترین شراکت دار ہے۔ ان کا کہنا تھا کہ اس تعاون سے دونوں ممالک کے درمیان تعلیمی، تحقیقی اور تکنیکی روابط کو نئی جہت ملے گی اور نوجوانوں کو عالمی معیار کی مہارتیں فراہم کرنے میں مدد ملے گی۔
تقریب سے خطاب کرتے ہوئے کوالٹی انہانسمنٹ سیل کی ڈائریکٹر ڈاکٹر صائمہ ناصر نے کہا کہ یہ لیٹر آف انٹینٹ یونیورسٹی کی بین الاقوامی روابط کو وسعت دینے کی حکمت عملی کا اہم حصہ ہے، جس کے ذریعے دنیا کے ممتاز تعلیمی اداروں کے ساتھ تعاون کو مزید فروغ دیا جا رہا ہے۔
انہوں نے کہا کہ اس شراکت داری سے طلبہ اور اساتذہ کو بین الاقوامی معیار کے تعلیمی اور تحقیقی مواقع میسر آئیں گے، جس سے جامعہ کی علمی و تحقیقی صلاحیتوں میں مزید اضافہ ہوگا۔
تقریب میں یونیورسٹی کے ڈینز، پروفیسرز، مختلف شعبہ جات کے سربراہان اور دیگر اعلیٰ انتظامی افسران نے بھی شرکت کی۔
