ایشین انڈر 18 والی بال چیمپئن شپ میں پاکستان نے شاندار کارکردگی کا سلسلہ برقرار رکھتے ہوئے اپنے دوسرے گروپ میچ میں قازقستان کو یکطرفہ مقابلے کے بعد 0-3 سے شکست دے کر مسلسل دوسری کامیابی حاصل کر لی۔
پاکستانی ٹیم نے ابتدا ہی سے میچ پر مکمل کنٹرول برقرار رکھا اور قازقستان کو کسی بھی مرحلے پر واپسی کا موقع نہ دیتے ہوئے تینوں سیٹس 14-25، 12-25 اور 9-25 کے واضح فرق سے اپنے نام کیے۔
مسلسل دو گروپ میچز میں کامیابی کے بعد پاکستان نے ایشین انڈر 18 والی بال چیمپئن شپ کے کوارٹر فائنل کے لیے اپنی جگہ یقینی بنا لی ہے، جس کے بعد قومی ٹیم کا اعتماد مزید بلند ہو گیا ہے۔
قومی ٹیم ایونٹ میں اپنا اگلا گروپ میچ کل میزبان تھائی لینڈ کے خلاف کھیلے گی، جہاں کامیابی کی صورت میں پاکستان گروپ مرحلے کا اختتام ناقابلِ شکست رہتے ہوئے کرے گا۔
پاکستانی کھلاڑیوں کی شاندار ٹیم ورک، مضبوط دفاع اور مؤثر اٹیکنگ نے قازقستان کے خلاف کامیابی میں اہم کردار ادا کیا، جبکہ ٹیم کی مسلسل فتوحات نے شائقینِ والی بال کی امیدیں بھی بڑھا دی ہیں۔
