تھائی لینڈ: دارالحکومت بینکاک کے بار میں آگ سے تباہی، متعدد افراد لاپتہ، ہلاکتوں میں اضافے کا خدشہ

تھائی لینڈ کے دارالحکومت بینکاک میں واقع ایک بار میں لگنے والی خوفناک آگ کے نتیجے میں کم از کم 27 افراد جاں بحق جبکہ 60 سے زائد زخمی ہو گئے ہیں۔ حکام کے مطابق متعدد افراد تاحال لاپتہ ہیں، جس کے باعث ہلاکتوں میں مزید اضافے کا خدشہ ظاہر کیا جا رہا ہے۔

تھائی حکام کے مطابق پیر اور منگل کی درمیانی شب تقریباً 12 بجے کے بعد فائر بریگیڈ کو آتشزدگی کی اطلاع موصول ہوئی۔ امدادی ٹیمیں جب جائے وقوعہ پر پہنچیں تو بار کے مرکزی دروازے سے بلند شعلے اٹھ رہے تھے اور اندر موجود افراد جان بچانے کے لیے چیختے ہوئے باہر نکلنے کی کوشش کر رہے تھے۔

سوشل میڈیا پر گردش کرنے والی ویڈیوز میں دیکھا جا سکتا ہے کہ آگ نے چند ہی لمحوں میں پوری عمارت کو اپنی لپیٹ میں لے لیا، جبکہ بعض افراد کے کپڑوں میں بھی آگ بھڑک اٹھی۔

تھائی لینڈ کے نائب وزیراعظم و وزیر داخلہ نے جائے وقوعہ کا دورہ کرتے ہوئے بتایا کہ اب تک 27 لاشیں نکالی جا چکی ہیں، جبکہ زخمیوں کو مختلف اسپتالوں میں منتقل کر دیا گیا ہے۔ انہوں نے کہا کہ آتشزدگی کی وجوہات جاننے کے لیے باضابطہ تحقیقات شروع کر دی گئی ہیں۔

ریسکیو حکام کے مطابق فائر فائٹرز نے تقریباً 30 منٹ کی مسلسل جدوجہد کے بعد آگ پر قابو پا لیا، تاہم اس وقت تک بار کے اندر موجود متعدد افراد شدید دھویں اور آگ کی لپیٹ میں آ چکے تھے۔

مقامی میڈیا کے مطابق جاں بحق ہونے والوں میں 9 مرد اور 18 خواتین شامل ہیں، جبکہ 60 سے زائد زخمی مختلف اسپتالوں میں زیر علاج ہیں۔ امدادی ٹیمیں اب بھی ملبے میں پھنسے ممکنہ متاثرین کی تلاش میں مصروف ہیں۔