کوئٹہ: حکومت بلوچستان نے صوبے میں انتظامی اصلاحات کے تحت ضلع کوئٹہ کو باضابطہ طور پر دو الگ اضلاع میں تقسیم کرنے کا نوٹیفکیشن جاری کر دیا ہے، جبکہ نئے لسبیلہ ڈویژن کے قیام سمیت کئی اہم انتظامی تبدیلیوں کا بھی اعلان کیا گیا ہے۔
جاری کردہ نوٹیفکیشن کے مطابق کوئٹہ ڈویژن اب تین اضلاع پر مشتمل ہوگا، جن میں کوئٹہ ایسٹ، کوئٹہ ویسٹ اور مستونگ شامل ہیں۔
نوٹیفکیشن کے مطابق ضلع کوئٹہ ایسٹ میں سریاب، صدر اور سٹی سب ڈویژنز شامل کیے گئے ہیں، جبکہ ضلع کوئٹہ ویسٹ میں کچلاک، بروری اور پنجپائی سب ڈویژنز کو شامل کیا گیا ہے۔
حکومت بلوچستان نے ضلع مستونگ کو قلات ڈویژن سے الگ کرکے کوئٹہ ڈویژن کا حصہ بھی بنا دیا ہے، جس سے کوئٹہ ڈویژن کی انتظامی حدود میں مزید توسیع ہو گئی ہے۔
اسی نوٹیفکیشن کے تحت لسبیلہ ڈویژن کے قیام کی بھی منظوری دے دی گئی ہے۔ نئے ڈویژن میں لسبیلہ، حب اور آواران کے اضلاع شامل ہوں گے، جس کا مقصد انتظامی امور کو مزید مؤثر اور عوامی خدمات کی فراہمی کو بہتر بنانا ہے۔
مزید برآں، سب تحصیل سارونہ کو ضلع خضدار سے الگ کر دیا گیا ہے۔ نوٹیفکیشن کے مطابق اس کی دو یونین کونسلوں میں سے ایک کو ضلع لسبیلہ جبکہ دوسری کو ضلع حب میں شامل کر دیا گیا ہے۔
بلوچستان حکومت کے اس فیصلے کو صوبے میں انتظامی ڈھانچے کی بہتری اور مقامی سطح پر گورننس کو مؤثر بنانے کی جانب ایک اہم پیش رفت قرار دیا جا رہا ہے۔
