لاہور: حکومت پنجاب نے لاہور کے تاریخی مقامات، ثقافتی ورثے اور قدیم عمارتوں کے تحفظ و بحالی کے لیے قائم کیے گئے ہیریٹیج ایریا ریوائیول بورڈ کی سربراہی سابق وزیراعظم نواز شریف کے سپرد کر دی ہے۔ اس حوالے سے محکمہ بلدیات پنجاب نے باضابطہ گزٹ نوٹیفکیشن بھی جاری کر دیا ہے۔
نوٹیفکیشن کے مطابق گورنر پنجاب سردار سلیم حیدر کی منظوری کے بعد بورڈ کی تشکیل عمل میں لائی گئی، جبکہ اس کا قیام والڈ سٹیز اینڈ ہیریٹیج ایریاز اتھارٹی ایکٹ 2012 کے تحت کیا گیا ہے۔ اعلامیے میں کہا گیا ہے کہ یہ فیصلہ فوری طور پر نافذ العمل ہوگا۔
حکومتی فیصلے کے تحت نواز شریف لاہور کے تاریخی ورثے، قدیم عمارتوں اور ثقافتی مقامات کی اصل طرز پر بحالی اور تحفظ کے منصوبوں کی نگرانی کریں گے۔ بورڈ لاہور کے تاریخی علاقوں کی بحالی، آثارِ قدیمہ کے تحفظ اور ثقافتی شناخت کو فروغ دینے کے لیے مختلف منصوبوں کی نگرانی اور رہنمائی کرے گا۔
حکومت پنجاب کے مطابق ہیریٹیج ایریا ریوائیول بورڈ کا بنیادی مقصد لاہور کے تاریخی ورثے کو محفوظ بنانا، قدیم عمارتوں کی بحالی کے منصوبوں میں تیزی لانا اور شہر کی تاریخی و ثقافتی شناخت کو مزید مستحکم کرنا ہے، تاکہ آنے والی نسلوں کے لیے اس ورثے کو محفوظ رکھا جا سکے۔
