رپورٹ: سید فرزند علی
اسلام آباد: پاکستان علماء کونسل کے چیئرمین حافظ محمد طاہر محمود اشرفی نے اسرائیلی قابض افواج کی جانب سے القدس اور فلسطینی علاقوں کے مفتیٔ اعظم اور مسجد اقصیٰ کے امام شیخ محمد احمد محمد حسین کی گرفتاری کی شدید مذمت کرتے ہوئے ان کی فوری رہائی کا مطالبہ کیا ہے۔
شیخ طاہر اشرفی نے اپنے بیان میں کہا کہ ہم اسرائیلی قابض حکام سے مطالبہ کرتے ہیں کہ القدس اور فلسطینی علاقوں کے مفتیٔ اعظم شیخ محمد احمد محمد حسین کو فوری طور پر رہا کیا جائے، جنہیں روز جمعہ کو مسجد اقصیٰ میں نماز جمعہ کی ادائیگی کے بعد زبردستی گرفتار کیا گیا۔
انہوں نے کہا کہ مذہبی شخصیات کی گرفتاری اور مقدس مقامات کے تقدس کی پامالی بین الاقوامی قوانین، انسانی حقوق اور مذہبی آزادی کے بنیادی اصولوں کے منافی ہے۔
پاکستان علماء کونسل کے سربراہ نے عالمی برادری، اسلامی تعاون تنظیم (OIC) اور انسانی حقوق کے عالمی اداروں سے مطالبہ کیا کہ وہ اس واقعے کا فوری نوٹس لیں اور اسرائیل پر دباؤ ڈالیں تاکہ شیخ محمد احمد محمد حسین کو بلا تاخیر رہا کیا جائے اور مسجد اقصیٰ کے تقدس اور مذہبی آزادی کا تحفظ یقینی بنایا جا سکے۔
