Table of Contents
مکاؤ: پاکستان نے عالمی ڈاک ٹکٹ (فلاٹلی) کی دنیا میں ایک تاریخی کامیابی اپنے نام کر لی، جہاں ممتاز پاکستانی فلاٹلسٹ اور تاجر محمد عارف بالاگام والا (تمغۂ امتیاز) نے مکاؤ 2026 اسپیشلائزڈ ورلڈ اسٹامپ نمائش میں گولڈ میڈل جیت کر ایک نیا عالمی ریکارڈ قائم کر دیا۔
یہ اعزاز حاصل کرنے کے بعد محمد عارف بالاگام والا پاکستان کی 79 سالہ تاریخ میں پہلے فلاٹلسٹ بن گئے ہیں جنہوں نے پانچ فریم کیٹیگری میں یہ باوقار عالمی گولڈ میڈل اپنے نام کیا، جبکہ عالمی فلاٹلی کی تاریخ میں بھی یہ ایک منفرد سنگ میل قرار دیا جا رہا ہے۔
برٹش انڈیا سے پاکستان کے ابتدائی ڈاک ٹکٹوں پر تحقیق کو عالمی پذیرائی
محمد عارف بالاگام والا کو یہ اعزاز ان کے تحقیقی اور نادر کلیکشن "British India Stamps Overprints Pakistan 1947–1949” پر دیا گیا، جس میں قیام پاکستان کے ابتدائی دور میں استعمال ہونے والے اوور پرنٹ شدہ ڈاک ٹکٹوں کی تاریخی اور تحقیقی دستاویزات شامل ہیں۔
بین الاقوامی ججز نے اس کلیکشن کو پاکستان کی ابتدائی ڈاک تاریخ پر مبنی منفرد، جامع اور اعلیٰ تحقیقی نمائش قرار دیتے ہوئے اسے گولڈ میڈل کا مستحق قرار دیا۔
2026 میں مسلسل عالمی کامیابیاں
یہ محمد عارف بالاگام والا کی 2026 میں حاصل ہونے والی ایک اور بڑی عالمی کامیابی ہے۔
اس سے قبل وہ دبئی 2026 ورلڈ اسٹامپ نمائش میں اپنے کلیکشن "Pakistan Overprints on India Stationery 1947–1949” پر بھی گولڈ میڈل حاصل کر چکے ہیں۔
اسی سال انہوں نے امریکا میں منعقد ہونے والی Boston World Stamp Expo 2026 میں انتہائی باوقار Court of Honour اعزاز بھی حاصل کیا، جو صرف عالمی معیار کے غیر معمولی کلیکشنز کو دیا جاتا ہے۔
وہ اس اعزاز تک پہنچنے والے بھی پاکستان کی تاریخ کے پہلے فلاٹلسٹ ہیں۔
ماہرین نے قومی اعزاز قرار دے دیا
بین الاقوامی فلاٹلی ماہرین اور کلیکٹرز نے محمد عارف بالاگام والا کی اس غیر معمولی کامیابی کو پاکستان کے لیے باعثِ فخر قرار دیا ہے۔
ماہرین کے مطابق یہ کامیابی نہ صرف پاکستان کی ڈاک ٹکٹوں کی تاریخ اور تحقیق کو عالمی سطح پر نمایاں کرے گی بلکہ نئی نسل کے پاکستانی فلاٹلسٹس اور کلیکٹرز کو بھی بین الاقوامی مقابلوں میں شرکت اور تحقیق کی جانب راغب کرے گی۔
انہوں نے کہا کہ عالمی سطح پر حاصل ہونے والی یہ کامیابی پاکستان کے فلاٹلی شعبے کی بڑھتی ہوئی اہمیت اور تحقیقی صلاحیتوں کا واضح ثبوت ہے۔
