ابوظبی: متحدہ عرب امارات (یو اے ای) نے اپنے ویزا آن ارائیول پروگرام کو مزید وسعت دیتے ہوئے چھ نئے ممالک کے شہریوں کو اس سہولت میں شامل کرنے کا اعلان کر دیا ہے۔ نئی پالیسی کے تحت مخصوص شرائط پوری کرنے والے مسافر اب یو اے ای پہنچنے پر 14 یا 60 روزہ ویزا حاصل کر سکیں گے۔
حکام کے مطابق یہ نئی پالیسی 25 جون 2026 سے نافذ العمل ہو چکی ہے۔ اس کے تحت انڈونیشیا، ویتنام، تھائی لینڈ، فلپائن، کینیا اور جنوبی افریقہ کے عام پاسپورٹ رکھنے والے شہری ویزا آن ارائیول کی سہولت سے فائدہ اٹھا سکیں گے، تاہم اس کے لیے ضروری ہوگا کہ ان کے پاس امریکا، یورپی یونین کے کسی رکن ملک، برطانیہ، کینیڈا، جاپان، آسٹریلیا، نیوزی لینڈ، سنگاپور یا جنوبی کوریا کا مؤثر رہائشی اجازت نامہ یا متعلقہ دستاویز موجود ہو۔
اماراتی وزارت خارجہ نے اپنے بیان میں کہا ہے کہ ویزا پالیسی میں یہ توسیع دوست ممالک کے ساتھ تعلقات مضبوط بنانے، سیاحت کو فروغ دینے، سرمایہ کاری بڑھانے اور عوامی روابط مستحکم کرنے کی حکمت عملی کا حصہ ہے۔ وزارت کے مطابق حکومت بین الاقوامی مسافروں کے لیے سفری سہولیات کو مزید آسان اور مؤثر بنانے کے لیے مسلسل اقدامات کر رہی ہے۔
وفاقی اتھارٹی برائے شناخت، شہریت، کسٹمز اور پورٹس سیکیورٹی (ICP) کے مطابق درخواست دہندگان کے لیے دو اقسام کے ویزا دستیاب ہوں گے۔ 14 روزہ ویزا ایک مرتبہ مزید بڑھایا جا سکے گا، جبکہ 60 روزہ ویزا قابل توسیع نہیں ہوگا اور اس کی مدت مکمل ہونے پر ملک چھوڑنا لازم ہوگا۔
حکام نے واضح کیا ہے کہ مقررہ مدت سے زیادہ قیام کی صورت میں روزانہ 50 درہم جرمانہ عائد کیا جائے گا۔ اسی طرح 14 روزہ ویزا کی درخواست فیس 100 درہم جبکہ 60 روزہ ویزا کی فیس 250 درہم مقرر کی گئی ہے۔
اماراتی حکام کا کہنا ہے کہ نئی پالیسی کا مقصد عالمی معیار کے مطابق ویزا نظام کو مزید جدید بنانا، سیاحت اور کاروباری سرگرمیوں کو فروغ دینا اور متحدہ عرب امارات کو عالمی سرمایہ کاری، تجارت اور ہنر مند افراد کے لیے مزید پرکشش منزل بنانا ہے۔
