اسلام آباد: ہائر ایجوکیشن کمیشن (ایچ ای سی) نے غیر ملکی ڈگریوں سے متعلق نئی ایڈوائزری جاری کرتے ہوئے واضح کیا ہے کہ بعض تعلیمی فارمیٹس کو 2026 کے بعد پاکستان میں تسلیم نہیں کیا جائے گا۔
ایچ ای سی کے مطابق طلبہ کو بیرون ملک یونیورسٹیوں میں داخلہ لینے سے قبل احتیاط برتنی چاہیے، کیونکہ تمام آن لائن یا مخلوط تعلیمی پروگرام پاکستان میں قابلِ قبول نہیں ہوں گے۔
جاری کردہ ایڈوائزری میں کہا گیا ہے کہ وہ ڈگریاں جو بظاہر روایتی آن کیمپس (on-campus) پروگرام کے طور پر رجسٹرڈ ہوں لیکن مکمل طور پر آن لائن یا فاصلاتی طریقہ تعلیم کے ذریعے مکمل کی گئی ہوں، انہیں 2026 کے بعد پاکستان میں تسلیم نہیں کیا جائے گا۔
کمیشن نے واضح کیا ہے کہ یہ پالیسی نہ صرف ان طلبہ پر لاگو ہوگی جو مستقبل میں بیرون ملک تعلیم حاصل کرنے کا ارادہ رکھتے ہیں بلکہ ان طلبہ پر بھی اس کا اطلاق ہوگا جو پہلے سے غیر ملکی جامعات میں زیر تعلیم ہیں۔
ایچ ای سی نے طلبہ اور والدین کو مشورہ دیا ہے کہ وہ کسی بھی غیر ملکی تعلیمی پروگرام میں داخلے سے قبل اس کی تصدیق لازمی کریں تاکہ مستقبل میں ڈگری کی قبولیت سے متعلق مسائل سے بچا جا سکے۔
