کوئٹہ: بلوچستان اسمبلی کی رکن فرح عظیم شاہ نے کہا ہے کہ بلوچستان کے مسائل کا مستقل اور پائیدار حل طاقت کے استعمال، نفرت یا فاصلے پیدا کرنے میں نہیں بلکہ عوام کا اعتماد بحال کرنے، انصاف کی فراہمی اور محبت و توجہ کے ذریعے ممکن ہے۔
اپنے ایک بیان میں رکن بلوچستان اسمبلی نے کہا کہ جو افراد دہشت گردی میں ملوث نہیں لیکن محرومی، مایوسی اور ناامیدی کے باعث غلط راستوں کی طرف مائل ہو رہے ہیں، انہیں عزت، بنیادی حقوق اور بہتر مستقبل کی امید فراہم کرنا ریاست اور معاشرے کی مشترکہ ذمہ داری ہے۔
فرح عظیم شاہ نے کہا کہ جب عوامی نمائندے ترقی کرتے رہیں لیکن عام شہری بنیادی سہولیات سے محروم ہوں، بچوں کو معیاری تعلیم، صاف پانی، صحت اور روزگار کے مواقع دستیاب نہ ہوں تو احساسِ محرومی جنم لیتا ہے۔ ایسے حالات میں نوجوانوں میں مایوسی بڑھتی ہے، جس کے اثرات پورے معاشرے پر مرتب ہوتے ہیں۔
انہوں نے زور دیا کہ بلوچستان کے مسائل کو نظر انداز کرنے کے بجائے ان کے مؤثر، حقیقت پسندانہ اور دیرپا حل کی طرف توجہ دینا وقت کی اہم ضرورت ہے۔ ان کا کہنا تھا کہ عوامی شکایات کا ازالہ اور بنیادی سہولیات کی فراہمی صوبے میں استحکام اور ترقی کے لیے ناگزیر ہے۔
رکن اسمبلی نے کہا کہ اب بھی وقت ہے کہ تمام متعلقہ ادارے اور ذمہ دار حلقے اپنی کمزوریوں کا جائزہ لیں اور عوام کا اعتماد بحال کرنے کے لیے عملی اقدامات کریں۔ انہوں نے اس بات پر زور دیا کہ بلوچستان کے نوجوانوں کو قومی دھارے میں شامل کرتے ہوئے انہیں ترقی، تعلیم اور روزگار کے مساوی مواقع فراہم کیے جائیں۔
فرح عظیم شاہ نے کہا کہ ملک کے دفاع، سلامتی اور خودمختاری پر کوئی سمجھوتہ نہیں کیا جا سکتا، تاہم اپنے جوانوں کی غیر ضروری قربانیوں سے بچنا بھی قومی ذمہ داری ہے۔ انہوں نے کہا کہ پائیدار امن اور استحکام صرف سیکیورٹی اقدامات سے نہیں بلکہ عوامی فلاح، انصاف اور شمولیت کے ذریعے حاصل کیا جا سکتا ہے۔
انہوں نے مزید کہا کہ بلوچستان کا روشن اور خوشحال مستقبل انصاف، ترقی، عوامی شراکت داری اور اپنے عوام سے سچی محبت کے ذریعے ہی ممکن ہے۔ انہوں نے اس عزم کا اظہار کیا کہ صوبے کے عوامی مسائل کے حل اور بلوچستان کی ترقی کے لیے تمام متعلقہ حلقوں کو مشترکہ اور سنجیدہ کوششیں کرنا ہوں گی۔
