وزیراعظم محمد شہباز شریف نے برآمدات پر مبنی معاشی ترقی کو حکومت کی اولین ترجیح قرار دیتے ہوئے کہا ہے کہ نیشنل ٹیرف کمیشن کی فعال اور شفاف کارکردگی ملک میں صنعت، تجارت اور سرمایہ کاری کے فروغ کے لیے ناگزیر ہے۔
وزیراعظم آفس کے میڈیا ونگ کے مطابق وزیراعظم محمد شہباز شریف کی زیر صدارت معیشت کی مجموعی ترقی اور نیشنل ٹیرف پالیسی 2025-30 کے نفاذ سے متعلق ایک اہم جائزہ اجلاس منعقد ہوا۔ اجلاس میں ملک کی اقتصادی سمت، تجارتی اصلاحات اور برآمدات کے فروغ کے لیے جاری اقدامات پر تفصیلی غور کیا گیا۔
اجلاس میں نائب وزیراعظم و وزیر خارجہ اسحاق ڈار، وفاقی وزیر قانون اعظم نذیر تارڑ، وفاقی وزیر موسمیاتی تبدیلی مصدق ملک، وفاقی وزیر اقتصادی امور احد خان چیمہ، وفاقی وزیر خزانہ محمد اورنگزیب، وزیر پیٹرولیم علی پرویز ملک، وزیر مملکت برائے خزانہ و ریلوے بلال اظہر کیانی، وزیراعظم کے معاون خصوصی ہارون اختر اور دیگر اعلیٰ حکام نے شرکت کی۔
اجلاس کو بریفنگ میں بتایا گیا کہ نیشنل ٹیرف پالیسی 2025-30 کے تحت مختلف شعبوں میں ٹیرف میں مرحلہ وار کمی کی جائے گی، جس کا بنیادی مقصد برآمدات پر مبنی اقتصادی ترقی کو فروغ دینا ہے۔
پالیسی کے تحت لاجسٹکس کے شعبے میں بہتری کے لیے ریفریجریٹڈ کنٹینرز اور سیمی ٹریلرز پر عائد ڈیوٹیز ختم کرنے کی تجویز دی گئی ہے، جبکہ تعمیراتی شعبے کی ترقی کے لیے خصوصی مشینری اور گاڑیوں پر کسٹمز ڈیوٹیز میں کمی کی جا رہی ہے۔
اسی طرح فارماسیوٹیکل سیکٹر کو سہولیات فراہم کرنے کے لیے خام مال، خصوصاً کینسر کی ادویات میں استعمال ہونے والے مواد پر کسٹمز ڈیوٹی ختم کرنے کی بھی سفارش کی گئی ہے۔
وزیراعظم شہباز شریف نے کہا کہ نیشنل ٹیرف کمیشن کی شفاف اور مؤثر کارکردگی ملکی صنعت، تجارت اور سرمایہ کاری کے لیے بنیادی حیثیت رکھتی ہے۔ انہوں نے ہدایت کی کہ سرمایہ کاروں اور صنعت کاروں کو سہولت فراہم کرنے کے لیے کمیشن اپنا فعال کردار ادا کرے۔
انہوں نے مزید کہا کہ عالمی معیار کے مطابق اصلاحات کے لیے جدید ٹیکنالوجی، انفارمیشن ٹیکنالوجی اور مصنوعی ذہانت (AI) کے استعمال کو فروغ دے کر ٹیرف نظام کو مزید مؤثر اور جدید بنایا جائے۔
English Tags:
Shehbaz Sharif, Pakistan Economy, National Tariff Policy 2025-30, Export Led Growth, Tariff Reform, NT Commission, Pakistan Trade Policy, Economic Development, Investment in Pakistan, Industry Pakistan, Customs Duty, Logistics Sector, Pharmaceutical Industry, Construction Sector, AI in Governance, Pakistan Government, Economic Policy, Import Tariffs, Foreign Investment, Breaking News Pakistan
