اسلام آباد: نائب وزیراعظم و وزیر خارجہ سینیٹر محمد اسحاق ڈار سے بیلجیم میں پاکستان کے سفیر رحیم حیات قریشی نے منگل کو ملاقات کی، جس میں پاکستان اور یورپی یونین کے درمیان دوطرفہ تعاون کے مختلف پہلوؤں پر تبادلہ خیال کیا گیا۔
دفتر خارجہ کے مطابق ملاقات کے دوران نائب وزیراعظم نے یورپی یونین کی اعلیٰ نمائندہ/نائب صدر کے حالیہ دورہ پاکستان کے مثبت نتائج کو سراہتے ہوئے ہدایت کی کہ اس دورے کے دوران طے پانے والی مفاہمتوں پر عملدرآمد کی پیش رفت کو یقینی بنایا جائے۔
اسحاق ڈار نے کہا کہ پاکستان یورپی یونین کے ساتھ تعاون کو مزید وسعت دینے کے لیے پرعزم ہے، خصوصاً تجارت، سرمایہ کاری، تعلیم اور عوامی سطح پر روابط کے شعبوں میں تعلقات کو مضبوط بنانے کی ضرورت ہے۔
انہوں نے سفیر کو ہدایت کی کہ وہ ان شعبوں میں عملی اقدامات اور فالو اپ کو تیز کریں تاکہ دونوں فریقین کے درمیان جاری تعاون کو مزید مؤثر اور نتیجہ خیز بنایا جا سکے۔
ملاقات میں اس بات پر بھی اتفاق کیا گیا کہ پاکستان اور یورپی یونین کے درمیان بڑھتے ہوئے روابط خطے میں معاشی استحکام اور ترقی کے لیے اہم کردار ادا کر سکتے ہیں۔
