لاہور: وفاقی وزیر ریلوے حنیف عباسی نے وزیراعظم شہباز شریف کی ہدایت پر دو ٹرینیں بحال کرنے کا اعلان کردیا۔
حنیف عباسی نے لاہور سے جاری بیان میں کہا کہ موہنجو دڑو ٹرین 15 ستمبر سے دوبارہ چلائی جائے گی۔
انہوں نے بتایا کہ سیالکوٹ سے راولپنڈی کے درمیان ٹرین 15 اکتوبر سے بحال ہوگی۔
ریلوے انتظامیہ کو ہدایات جاری
وفاقی وزیر نے کہا کہ دونوں ٹرینوں کی بحالی کے لیے ضروری اقدامات کی ہدایت کردی گئی ہے۔
انہوں نے کہا کہ حکومت مرحلہ وار تمام بند ٹرینیں بحال کرے گی۔
حنیف عباسی کے مطابق مسافروں کو بہتر سفری سہولیات فراہم کرنا ریلوے کی ترجیح ہے۔
ایم ایل ون منصوبہ آخری مرحلے میں
وفاقی وزیر ریلوے نے ایم ایل ون منصوبے پر بھی گفتگو کی۔
انہوں نے کہا کہ منصوبے سے متعلق ورکنگ آخری مرحلے میں ہے۔ ان کے مطابق ایم ایل ون کا آغاز جنوری میں طے ہے۔
حنیف عباسی نے کہا کہ ایم ایل ون منصوبہ پاکستان ریلوے کو تبدیل کر دے گا۔
انہوں نے بتایا کہ وزیراعظم شہباز شریف منصوبے پر مسلسل پیش رفت سے آگاہی حاصل کر رہے ہیں۔
وفاقی وزیر نے کہا کہ ریلوے حکام وزیراعظم کی توقعات پر پورا اترنے کے لیے کام کر رہے ہیں۔
