مظفرآباد: آزاد جموں و کشمیر قانون ساز اسمبلی کے انتخابات کے پہلے مرحلے میں آج میرپور ڈویژن کے تین اضلاع میرپور، کوٹلی اور بھمبر کے 13 انتخابی حلقوں میں پولنگ ہو رہی ہے، جس کے لیے تمام انتظامات مکمل کر لیے گئے ہیں۔
الیکشن کمیشن کے مطابق پولنگ اسٹیشنوں پر انتخابی سامان پہنچا دیا گیا ہے، جبکہ سیکیورٹی کے فول پروف انتظامات کیے گئے ہیں تاکہ ووٹنگ کا عمل پرامن اور شفاف انداز میں مکمل ہو سکے۔
انتخابات میں پاکستان پیپلز پارٹی، پاکستان مسلم لیگ (ن)، استحکامِ پاکستان پارٹی اور آزاد امیدواروں سمیت مجموعی طور پر 296 امیدوار قسمت آزما رہے ہیں۔
چیف الیکشن کمشنر آزاد کشمیر جسٹس (ر) غلام مصطفیٰ مغل نے کہا ہے کہ انتخابی عمل میں رکاوٹ ڈالنے یا ضابطہ اخلاق کی خلاف ورزی کرنے والوں کے خلاف قانون کے مطابق سخت کارروائی کی جائے گی۔
دوسری جانب چیف سیکریٹری آزاد جموں و کشمیر خوشحال خان نے کہا کہ عوام نے جمہوری عمل پر اعتماد کا اظہار کیا ہے اور پرامن انتخابات کے انعقاد کے لیے تمام ریاستی ادارے مکمل طور پر تیار ہیں۔
انہوں نے واضح کیا کہ انتخابی عمل میں خلل ڈالنے، امن و امان خراب کرنے یا کسی بھی غیر قانونی سرگرمی میں ملوث عناصر کے خلاف فوری قانونی کارروائی عمل میں لائی جائے گی تاکہ ووٹنگ کا عمل شفاف، آزاد اور پرامن ماحول میں مکمل ہو سکے۔
