اسلام آباد: پاکستان میں جمہوریہ کیوبا کے سفارت خانے نے پاکستان-کیوبا سوشل فورم کے اشتراک سے کیوبا کے انقلابی رہنما اور سابق صدر فیڈل کاسترو کی پیدائش کی صد سالہ تقریبات کے سلسلے میں "فیڈل پور سیمپری” (Fidel Por Siempre – فیڈل ہمیشہ کے لیے) کے عنوان سے فوٹو گرافی اور کتابوں کی نمائش کا افتتاح کر دیا۔
کیوبا کے سفارت خانے میں منعقدہ افتتاحی تقریب میں سیاسی رہنماؤں، اسلام آباد میں تعینات سفارتی کور کے ارکان، دانشوروں، سماجی شخصیات اور پاک-کیوبا دوستی کے حامی افراد نے شرکت کی۔ تقریب کے مہمانِ خصوصی سینیٹر مشاہد حسین سید تھے، جبکہ ڈپلومیٹک کور کے ڈین بھی اس موقع پر موجود تھے۔
سینیٹر مشاہد حسین سید نے اپنے خطاب میں فیڈل کاسترو کی عالمی سیاسی جدوجہد، آزادی، سماجی انصاف اور بین الاقوامی یکجہتی کے لیے ان کی خدمات کو خراجِ تحسین پیش کیا۔ انہوں نے کہا کہ 2005 کے تباہ کن زلزلے کے بعد پاکستان میں خدمات انجام دینے والے کیوبا کے میڈیکل بریگیڈز اور کیوبا سے تعلیم حاصل کرنے والے پاکستانی ڈاکٹروں نے دونوں ممالک کے درمیان دوستی اور انسانی تعاون کو مزید مضبوط کیا، جو فیڈل کاسترو کے انسان دوست نظریے کی عکاسی کرتا ہے۔
پاکستان میں کیوبا کے سفیر ڈیمین کورڈیرو نے اپنے خطاب میں کہا کہ فیڈل کاسترو کی صد سالہ یاد کے ساتھ ساتھ 26 جولائی کو کیوبا میں قومی بغاوت کا دن (National Rebellion Day) بھی منایا جاتا ہے، جو کیوبا کے انقلاب کی تاریخ میں ایک اہم سنگ میل کی حیثیت رکھتا ہے۔
انہوں نے کہا کہ فوٹو گرافی اور کتابوں کی یہ نمائش صرف ماضی کی یاد تازہ کرنے کے لیے نہیں بلکہ اس زندہ ورثے کو خراجِ تحسین پیش کرنے کے لیے منعقد کی گئی ہے، جس کی بنیاد جرات، سماجی انصاف، خودمختاری اور بین الاقوامی یکجہتی جیسے اصولوں پر قائم ہے۔
پاکستان-کیوبا سوشل فورم کے صدر رمضان مغل نے اس موقع پر کہا کہ اس نمائش کا مقصد فیڈل کاسترو کی جدوجہد اور پاک-کیوبا تعلقات کی مشترکہ تاریخ کو محفوظ رکھنا اور دونوں ممالک کے درمیان دوستی کے رشتے کو مزید مستحکم کرنا ہے۔
تقریب کے اختتام پر شرکاء نے فیڈل کاسترو کی زندگی، انقلابی جدوجہد اور عالمی سیاست پر مبنی نادر تصاویر اور کتابوں کا مشاہدہ کیا اور پاک-کیوبا تعلقات کے فروغ کے عزم کا اظہار کیا۔
