ازبکستان میں پاکستان کے نئے سفیر مدثر ٹیپو نے اپنی سفارتی ذمہ داریاں باضابطہ طور پر سنبھالتے ہوئے ازبکستان کے وزیر خارجہ بخیتیار سیدوف کو اپنی سفارتی اسناد پیش کر دیں۔
سفارتی اسناد پیش کرنے کے بعد سفیر مدثر ٹیپو نے اپنے بیان میں کہا کہ ازبک وزیر خارجہ سے ملاقات اور انہیں اسناد پیش کرنا ان کے لیے اعزاز کی بات ہے۔ انہوں نے اس عزم کا اظہار کیا کہ وہ پاکستان اور ازبکستان کے درمیان دوطرفہ تعلقات کو مزید مضبوط بنانے، اقتصادی تعاون کے فروغ اور باہمی روابط کو وسعت دینے کے لیے بھرپور کردار ادا کریں گے۔
اس موقع پر ازبکستان کے وزیر خارجہ بخیتیار سیدوف نے بھی ملاقات کو مثبت قرار دیتے ہوئے کہا کہ دونوں رہنماؤں کے درمیان مختلف دوطرفہ اور علاقائی امور پر تفصیلی تبادلہ خیال کیا گیا۔ انہوں نے پاکستان اور ازبکستان کے درمیان موجود دوستانہ تعلقات کو مزید مستحکم بنانے کی خواہش کا اظہار کیا۔
پاکستان اور ازبکستان کے درمیان حالیہ برسوں میں تجارت، سرمایہ کاری، علاقائی روابط، ٹرانسپورٹ، توانائی اور ثقافتی تعاون سمیت مختلف شعبوں میں روابط میں مسلسل اضافہ دیکھنے میں آیا ہے، جبکہ دونوں ممالک وسطی اور جنوبی ایشیا کے درمیان اقتصادی روابط کو فروغ دینے کے لیے بھی مشترکہ دلچسپی رکھتے ہیں۔
