پاکستان سمیت 29 ممالک نے ورلڈ آرٹیفیشل انٹیلیجنس کوآپریشن آرگنائزیشن (WAICO) کے قیام کے معاہدے پر دستخط کر دیے ہیں، جس کے بعد یہ تنظیم مصنوعی ذہانت (AI) کے شعبے میں عالمی تعاون کو فروغ دینے والی ایک نئی بین الحکومتی تنظیم کے طور پر سامنے آئے گی۔
اماراتی خبر رساں ایجنسی نے شِنہوا کے حوالے سے بتایا ہے کہ WAICO ایک آزاد بین الحکومتی بین الاقوامی تنظیم ہوگی، جس کا صدر دفتر چین کے شہر شنگھائی میں قائم کیا جائے گا۔
معاہدے پر دستخط کرنے والے 29 ممالک میں پاکستان، روس، قازقستان، لاؤس، انڈونیشیا اور دیگر ممالک شامل ہیں، جو تنظیم کے بانی ارکان کی حیثیت سے اس کے قیام میں شریک ہوں گے۔
معاہدے کے مطابق تنظیم اپنی سرگرمیاں اقوام متحدہ کے منشور کے مقاصد اور اصولوں کے مطابق انجام دے گی۔ اس کی بنیاد باہمی مشاورت، مشترکہ تعاون، مساوی شراکت داری اور مشترکہ مفاد پر رکھی گئی ہے، جبکہ انسانی فلاح و بہبود کو تنظیم کی تمام پالیسیوں اور اقدامات کا مرکز بنایا جائے گا۔
WAICO کا بنیادی مقصد مصنوعی ذہانت کے شعبے میں بین الاقوامی تعاون کو فروغ دینا، عالمی سطح پر AI سے متعلق نظم و نسق کو مضبوط بنانا اور ایسی پالیسیوں کی حوصلہ افزائی کرنا ہے جو مصنوعی ذہانت کو محفوظ، منصفانہ، شفاف اور انسانیت کے مفاد میں استعمال کرنے کو یقینی بنائیں۔
تنظیم کے قیام سے توقع کی جا رہی ہے کہ رکن ممالک تحقیق، ٹیکنالوجی، استعداد کار، مہارتوں کے تبادلے اور AI سے متعلق ضابطہ سازی کے شعبوں میں ایک دوسرے کے ساتھ قریبی تعاون کریں گے، تاکہ مصنوعی ذہانت کی ترقی کے ثمرات دنیا بھر کے ممالک تک مساوی انداز میں پہنچ سکیں۔
