دبئی: انٹرنیشنل کرکٹ کونسل (آئی سی سی) نے آئی سی سی ڈیولپمنٹ ایوارڈز 2025 کے عالمی فاتحین کا اعلان کر دیا، جن میں دنیا بھر میں کرکٹ کے فروغ، خواتین کی کرکٹ، سماجی خدمات، ڈیجیٹل شمولیت اور شاندار کارکردگی کا مظاہرہ کرنے والے ایسوسی ایٹ ممبر بورڈز کو مختلف اعزازات سے نوازا گیا۔
عالمی فاتحین کا انتخاب جون 2025 میں اعلان کیے گئے علاقائی فاتحین میں سے کیا گیا، جبکہ ان کے ناموں کا اعلان آئی سی سی کی سالانہ کانفرنس کے دوران کیا گیا۔
ایمرٹس کرکٹ بورڈ کے ترجمان ایماد حمید کے مطابق ایمریٹس کرکٹ بورڈ نے سب سے زیادہ تین عالمی ایوارڈز اپنے نام کیے۔
بورڈ کو "Merit Bonvoy ICC Development Initiative of the Year” ایوارڈ گرلز انڈر-15 اکیڈمی لیگ کے کامیاب انعقاد پر دیا گیا، جس نے نوجوان لڑکیوں کو کرکٹ میں مساوی مواقع فراہم کرنے میں اہم کردار ادا کیا۔
خواتین کی کرکٹ کے فروغ کے لیے "ICC Female Cricket Initiative of the Year” کا ایوارڈ مسلسل دوسرے سال مشترکہ طور پر ایمریٹس کرکٹ بورڈ اور ترکیے کرکٹ کو دیا گیا۔ متحدہ عرب امارات میں آئی سی سی ویمنز ٹی20 ورلڈ کپ 2024 کی میراث کو آگے بڑھاتے ہوئے مختلف پروگرامز کے ذریعے لڑکیوں کی کرکٹ کو فروغ دیا گیا، جبکہ ترکیے میں 20 صوبوں کی تین ہزار سے زائد لڑکیوں نے ICC Women’s Cricket Week کی سرگرمیوں میں حصہ لیا۔
اسی طرح ایمریٹس کرکٹ بورڈ کو ICC Associate Member Women’s Team Performance of the Year کا اعزاز بھی ملا۔ متحدہ عرب امارات کی خواتین ٹیم نے زمبابوے کے خلاف اپنی پہلی ون ڈے سیریز 2-2 سے برابر کی اور بعد ازاں ٹی20 سیریز 0-2 سے جیت کر کسی فل ممبر ٹیم کے خلاف بیرون ملک پہلی تاریخی سیریز فتح حاصل کی۔
مردوں کی ٹیم کی بہترین کارکردگی کا ایوارڈ فیڈراتزیونے کرکٹ اٹالیانا (Italy Cricket Federation) کو دیا گیا، جس نے پہلی مرتبہ اٹلی کو آئی سی سی مینز ٹی20 ورلڈ کپ 2026 کے لیے کوالیفائی کرایا۔ اٹلی نے یورپ کوالیفائر میں اسکاٹ لینڈ کو شکست دے کر یہ تاریخی کامیابی حاصل کی۔
جاپان کرکٹ ایسوسی ایشن نے Digital Fan Engagement of the Year کا ایوارڈ اپنی منفرد ڈیجیٹل مہم کے باعث جیتا، جس نے سوشل میڈیا پر 6 کروڑ 10 لاکھ سے زائد ویوز حاصل کیے اور ایک ماہ کے دوران 9 ہزار سے زائد نئے فالوورز حاصل کیے۔
برازیل کرکٹ فیڈریشن کو ICC Cricket for Good Social Impact Initiative of the Year ایوارڈ خواتین کے یونیورسٹی پروگرام کے لیے دیا گیا، جس کے تحت 42 طالبات کو اعلیٰ تعلیم کے لیے مالی معاونت فراہم کی گئی اور خواتین کی قیادت کو فروغ ملا۔
دوسری جانب نائیجیریا کرکٹ فیڈریشن نے ICC Criiio Cricket Festival of the Year with Rexona کا ایوارڈ زمفارا اسٹیٹ میں منعقدہ کرکٹ فیسٹیول کے لیے حاصل کیا، جس کا مقصد لڑکیوں کے لیے کھیل اور تعلیم کے مواقع میں اضافہ اور خواتین کی کرکٹ کو فروغ دینا تھا۔
آئی سی سی کے چیئرمین جے شاہ نے تمام فاتحین کو مبارکباد دیتے ہوئے کہا کہ یہ ایوارڈز ایسوسی ایٹ ممبر ممالک کی غیر معمولی خدمات کا اعتراف ہیں، جن کی کاوشیں کرکٹ کے ذریعے نئے مواقع پیدا کرنے، معاشروں کو مضبوط بنانے اور دنیا بھر میں کھیل کے فروغ میں اہم کردار ادا کر رہی ہیں۔
