اسلام آباد: نائب وزیراعظم و وزیر خارجہ سینیٹر محمد اسحاق ڈار اور سعودی عرب کے وزیر خارجہ شہزادہ فیصل بن فرحان کے درمیان ٹیلیفونک رابطہ ہوا، جس میں خطے کی موجودہ صورتحال، بڑھتی ہوئی کشیدگی اور امن و استحکام سے متعلق امور پر تفصیلی تبادلہ خیال کیا گیا۔
دفتر خارجہ کی جانب سے جاری بیان کے مطابق دونوں رہنماؤں نے خطے میں بڑھتی ہوئی کشیدگی پر گہری تشویش کا اظہار کرتے ہوئے اس بات پر زور دیا کہ موجودہ صورتحال میں کشیدگی میں فوری کمی ناگزیر ہے تاکہ امن و استحکام کو یقینی بنایا جا سکے۔
گفتگو کے دوران دونوں وزرائے خارجہ نے اس امر پر بھی اتفاق کیا کہ مسائل کے پائیدار حل کے لیے مذاکرات، سفارت کاری اور مسلسل رابطوں کا عمل جاری رہنا چاہیے۔ انہوں نے زور دیا کہ تنازعات کے حل کے لیے سیاسی اور سفارتی ذرائع کو ترجیح دی جائے۔
اس موقع پر وزیر خارجہ سینیٹر اسحاق ڈار نے تمام متعلقہ فریقوں پر زور دیا کہ وہ تحمل اور ذمہ داری کا مظاہرہ کریں اور جاری ثالثی و سفارتی کوششوں کو کامیاب بنانے کے لیے مناسب وقت اور موقع فراہم کریں۔
پاکستان اور سعودی عرب کے وزرائے خارجہ نے اس عزم کا اعادہ کیا کہ دونوں برادر ممالک خطے میں امن، استحکام اور تعمیری سفارت کاری کے فروغ کے لیے قریبی مشاورت اور تعاون جاری رکھیں گے۔
