بیروت: لبنان اور شام نے دوطرفہ تعلقات کو نئی بنیادوں پر استوار کرنے کی جانب اہم پیش رفت کرتے ہوئے عدم مداخلت کے معاہدے پر دستخط کر دیے، جس کا مقصد دونوں ممالک کے درمیان تعاون کو فروغ دینا اور ایک دوسرے کی خودمختاری کا احترام یقینی بنانا ہے۔
یہ معاہدہ بیروت میں شامی وزیر خارجہ اسد الشیبانی اور لبنانی وزیراعظم نواف سلام کی ملاقات کے دوران دونوں ممالک کے اعلیٰ سطحی وفود کی موجودگی میں طے پایا۔
معاہدے کے تحت دونوں ممالک نے اس بات پر اتفاق کیا کہ وہ ایک دوسرے کی خودمختاری، آزادی، قومی اتحاد اور علاقائی سالمیت کا مکمل احترام کریں گے۔ اس کے علاوہ دونوں ریاستیں برابری کی بنیاد پر تعلقات کو فروغ دیں گی اور ایک دوسرے کے اندرونی معاملات میں مداخلت سے گریز کریں گی۔
معاہدے میں دوطرفہ تعاون کے بنیادی اصول بھی شامل کیے گئے ہیں، جن کا مقصد سیاسی، سفارتی اور علاقائی سطح پر اعتماد سازی کو فروغ دینا اور دونوں ہمسایہ ممالک کے درمیان تعلقات کو مزید مستحکم بنانا ہے۔
اس موقع پر خطاب کرتے ہوئے لبنانی وزیراعظم نواف سلام نے کہا کہ لبنان اور شام نے اس امر پر اتفاق کیا ہے کہ آئندہ دونوں ممالک کے تعلقات باہمی احترام، مشترکہ مفادات اور برابری کی بنیاد پر استوار کیے جائیں گے۔
انہوں نے کہا کہ یہ معاہدہ دونوں ممالک کے درمیان اعتماد کو مضبوط بنانے اور مستقبل میں مختلف شعبوں میں تعاون کو وسعت دینے کے لیے اہم پیش رفت ثابت ہوگا۔
مبصرین کے مطابق یہ معاہدہ ایسے وقت میں سامنے آیا ہے جب مشرق وسطیٰ میں علاقائی سفارت کاری تیزی سے متحرک ہو رہی ہے اور مختلف ممالک اپنے دوطرفہ تعلقات کو مزید مستحکم بنانے کی کوشش کر رہے ہیں۔
