Table of Contents
مکہ مکرمہ: مسجد الحرام میں خانہ کعبہ کی سالانہ غسل کی روح پرور تقریب روایتی مذہبی احترام کے ساتھ منعقد کی گئی، جس کے دوران غلافِ کعبہ (کسوہ) کو دروازے کے مقام سے بلند کیا گیا اور بیت اللہ کے اندرونی حصے کو زمزم کے پانی، گلاب کے عرق اور اعلیٰ معیار کے عود کے خوشبودار محلول سے دھویا گیا۔
سعودی پریس ایجنسی (SPA) کے مطابق یہ تاریخی رسم ہر سال 15 محرم الحرام کو ادا کی جاتی ہے اور اسلام کی قدیم ترین مذہبی روایات میں شمار ہوتی ہے، جو خانہ کعبہ کے تقدس اور مسلمانوں کی عقیدت کی علامت ہے۔
شاہ سلمان کی نیابت میں تقریب
خادم الحرمین الشریفین شاہ سلمان بن عبدالعزیز کی جانب سے مکہ مکرمہ ریجن کے نائب گورنر شہزادہ سعود بن مشعل بن عبدالعزیز نے غسلِ کعبہ کی تقریب کی قیادت کی۔
تقریب کے دوران خانہ کعبہ کی اندرونی دیواروں، ستونوں اور فرش کو زمزم کے پانی، گلاب کے عرق اور نفیس عود کے خوشبودار محلول سے دھویا گیا، جبکہ اسی محلول میں خصوصی کپڑوں کو بھگو کر اندرونی حصوں کی صفائی بھی کی گئی۔ بعد ازاں دیواروں کو خشک کر کے خوشبو سے معطر کیا گیا۔
سعودی عرب کے خصوصی انتظامات
مسجد الحرام اور مسجد نبویؐ کے امور کی جنرل اتھارٹی نے بتایا کہ غسلِ کعبہ کی سالانہ تقریب کے لیے تکنیکی، سروسز اور انجینئرنگ ٹیموں کو پہلے ہی متحرک کر دیا گیا تھا تاکہ تمام انتظامات اعلیٰ معیار کے مطابق مکمل کیے جا سکیں۔
اتھارٹی کے مطابق خانہ کعبہ کی خدمت اور دیکھ بھال کی یہ روایت بانی مملکت شاہ عبدالعزیز کے دور سے جاری ہے، جسے خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کی قیادت میں پوری عقیدت کے ساتھ برقرار رکھا جا رہا ہے۔
سفارتی اور مذہبی شخصیات کی شرکت
سالانہ غسلِ کعبہ کی تقریب میں سعودی حکام، اسلامی ممالک کے سفارتی نمائندوں، معزز شخصیات اور بیت اللہ کے متولیوں نے شرکت کی۔
یہ روحانی روایت دنیا بھر کے مسلمانوں کے لیے خانہ کعبہ سے محبت، عقیدت اور احترام کی علامت سمجھی جاتی ہے، جبکہ سعودی عرب کی جانب سے حرمین شریفین کی خدمت اور دیکھ بھال کے عزم کا بھی عملی اظہار ہے۔
