ریاض: فیفا ورلڈ کپ 2026 میں سعودی عرب کی قومی فٹ بال ٹیم کے گروپ مرحلے سے ہی اخراج کے بعد سعودی فٹ بال فیڈریشن کے صدر یاسر المسحل نے اپنے عہدے سے استعفیٰ دینے کا اعلان کر دیا ہے۔
یاسر المسحل نے پیر کے روز سوشل میڈیا پر جاری اپنے بیان میں قومی ٹیم کی مایوس کن کارکردگی کی مکمل ذمہ داری قبول کرتے ہوئے کہا کہ ورلڈ کپ کے اگلے مرحلے تک رسائی حاصل نہ کرنا سعودی فٹ بال کے اہداف اور عوام کی توقعات کے برعکس ہے۔
انہوں نے اپنے بیان میں کہا، "ورلڈ کپ کے اگلے مرحلے سے قبل قومی ٹیم کا باہر ہو جانا ہمارے تمام عزائم کے خلاف ہے۔ میں اس کی مکمل ذمہ داری قبول کرتا ہوں اور ان تمام شائقین سے معذرت خواہ ہوں جو ٹیم سے بہتر نتائج کی امید رکھتے تھے۔”
یاسر المسحل نے مزید کہا کہ ذمہ دارانہ قیادت کا تقاضا ہے کہ نئے مرحلے اور نئی سوچ کے لیے راستہ ہموار کیا جائے، اسی لیے انہوں نے موجودہ مدت مکمل ہونے سے قبل اپنا منصب چھوڑنے کا فیصلہ کیا ہے۔
فیفا ورلڈ کپ 2026 میں سعودی عرب گروپ H میں صرف دو پوائنٹس حاصل کر سکا۔ گرین فالکنز نے یوراگوئے اور کیپ وردے کے خلاف میچ برابر کھیلے، جبکہ اسپین کے ہاتھوں شکست کے باعث وہ گروپ میں آخری پوزیشن پر رہے اور ناک آؤٹ مرحلے تک رسائی حاصل نہ کر سکے۔
یاسر المسحل گزشتہ سات برس سے سعودی فٹ بال فیڈریشن کی قیادت کر رہے تھے۔ ان کے دور میں سعودی عرب نے فیفا ورلڈ کپ 2034 کی میزبانی کے حقوق حاصل کرنے میں کامیابی حاصل کی، جسے ملک کی کھیلوں کی تاریخ کی اہم کامیابیوں میں شمار کیا جاتا ہے۔
واضح رہے کہ یہ سعودی عرب کی مسلسل تیسری اور مجموعی طور پر ساتویں فیفا ورلڈ کپ میں شرکت تھی، تاہم ٹیم اس بار بھی گروپ مرحلے کی رکاوٹ عبور کرنے میں ناکام رہی۔
