اسلام آباد: پاکستان کرکٹ ٹیم آئندہ ماہ ویسٹ انڈیز اور انگلینڈ کے اہم ٹیسٹ دوروں کی تیاریوں کے آخری مرحلے میں داخل ہو گئی ہے، جبکہ قومی ریڈ بال اسکواڈ 13 جولائی کو ویسٹ انڈیز روانہ ہوگا۔
ذرائع کے مطابق قومی ٹیم کے ہیڈ کوچ سرفراز احمد کی نگرانی میں کھلاڑی 8 جولائی کو اسلام آباد میں رپورٹ کریں گے، جہاں مختصر تربیتی کیمپ کے بعد اسکواڈ کو دو ٹیسٹ میچوں کی سیریز کے لیے ویسٹ انڈیز بھیجا جائے گا۔
اس وقت پاکستان کی ریڈ بال ٹیم کا تربیتی کیمپ لاہور میں جاری ہے، جس کے 2 جولائی کو اختتام پذیر ہونے کا امکان ہے۔ کیمپ میں کھلاڑیوں کی فٹنس، تکنیکی مہارت اور ٹیسٹ کرکٹ کی تیاری پر خصوصی توجہ دی جا رہی ہے تاکہ بیرون ملک اہم سیریز سے قبل ٹیم مکمل طور پر تیار ہو۔
اطلاعات کے مطابق پاکستان کرکٹ بورڈ (PCB) ویسٹ انڈیز اور اس کے بعد انگلینڈ کے دورے کے لیے تقریباً 17 رکنی مشترکہ اسکواڈ کا اعلان کر سکتا ہے، جو دونوں ٹیسٹ سیریز میں قومی ٹیم کی نمائندگی کرے گا۔
شیڈول کے مطابق پاکستان اور ویسٹ انڈیز کے درمیان پہلا ٹیسٹ میچ 25 جولائی سے شروع ہوگا، جبکہ دوسرا اور آخری ٹیسٹ 2 اگست سے کھیلا جائے گا۔
ویسٹ انڈیز سیریز کے بعد قومی ٹیم انگلینڈ کا رخ کرے گی، جہاں تین ٹیسٹ میچوں پر مشتمل سیریز کا آغاز 19 اگست سے ہوگا۔ اس دورے کو پاکستان کی آئندہ ٹیسٹ حکمت عملی اور عالمی درجہ بندی کے تناظر میں انتہائی اہم قرار دیا جا رہا ہے۔
کرکٹ حلقوں کا کہنا ہے کہ دونوں غیر ملکی دورے قومی ٹیم کے لیے سخت امتحان ثابت ہوں گے، جہاں کھلاڑیوں کی کارکردگی مستقبل کی ٹیسٹ منصوبہ بندی میں اہم کردار ادا کرے گی۔
