اسلام آباد: پاکستان تحریک انصاف (پی ٹی آئی) کے چیئرمین بیرسٹر گوہر نے اعلان کیا ہے کہ آزاد جموں و کشمیر قانون ساز اسمبلی کے عام انتخابات 2026 کے لیے پارٹی امیدواروں کی حتمی فہرست 2 جولائی کو جاری کی جائے گی۔
سماجی رابطے کی ویب سائٹ ایکس (سابقہ ٹوئٹر) پر جاری اپنے بیان میں بیرسٹر گوہر نے بتایا کہ پارٹی کو صدر آزاد جموں و کشمیر کی جانب سے انتخابات سے متعلق باضابطہ خط موصول ہو گیا ہے، جبکہ پی ٹی آئی کے پارلیمانی بورڈ نے آزاد کشمیر کی 33 نشستوں کے لیے امیدواروں کی سفارشات بھی مرکزی قیادت کو ارسال کر دی ہیں۔
انہوں نے کہا کہ جن امیدواروں کو پارٹی ٹکٹ نہ ملنے پر اعتراضات یا تحفظات ہیں، وہ 29 جون 2026 کو شام 4 بجے تک اپنی اپیلیں پی ٹی آئی کے مرکزی دفتر اسلام آباد میں جمع کرا سکتے ہیں۔
بیرسٹر گوہر کے مطابق تمام اپیلوں کی سماعت پی ٹی آئی آزاد کشمیر اپیلٹ بورڈ کرے گا، جو امیدواروں کے اعتراضات کا جائزہ لینے کے بعد حتمی فیصلے صادر کرے گا۔
چیئرمین پی ٹی آئی نے مزید کہا کہ اپیلوں پر فیصلے مکمل ہونے کے بعد آزاد جموں و کشمیر کے عام انتخابات 2026 کے لیے پارٹی امیدواروں کی حتمی فہرست 2 جولائی کو باضابطہ طور پر جاری کر دی جائے گی۔
سیاسی مبصرین کے مطابق آزاد کشمیر انتخابات کے لیے سیاسی سرگرمیاں تیزی سے بڑھ رہی ہیں اور بڑی جماعتوں کی جانب سے امیدواروں کے اعلانات کے بعد انتخابی مہم میں مزید شدت آنے کا امکان ہے۔
