ایف آئی ایچ ہاکی پرو لیگ میں پاکستان کی مایوس کن کارکردگی کا سلسلہ برقرار رہا، جہاں روایتی حریف بھارت نے یکطرفہ مقابلے کے بعد گرین شرٹس کو 7-1 سے شکست دے دی۔ ایونٹ میں پاکستان کی یہ مسلسل پندرہویں شکست ہے، جبکہ قومی ٹیم اب تک ایک بھی پوائنٹ حاصل کرنے میں ناکام رہی ہے۔
لندن میں کھیلے گئے میچ کا آغاز پاکستان کے لیے حوصلہ افزا ثابت ہوا۔ قومی ٹیم نے جارحانہ کھیل پیش کرتے ہوئے پہلے کوارٹر کے 12ویں منٹ میں ابو محمود کے ذریعے شاندار فیلڈ گول اسکور کیا اور پہلے کوارٹر کا اختتام 1-0 کی برتری کے ساتھ کیا۔
دوسرے کوارٹر میں بھارتی ٹیم نے زبردست کم بیک کرتے ہوئے کھیل کا رخ بدل دیا۔ بھارت نے مسلسل حملوں کے نتیجے میں دو گول اسکور کرکے برتری حاصل کر لی، جبکہ تیسرے کوارٹر میں اس نے مزید چار گول داغ کر پاکستانی دفاع کو مکمل طور پر بے بس کر دیا۔
چوتھے اور آخری کوارٹر میں بھی بھارتی ٹیم نے اپنی برتری برقرار رکھتے ہوئے ایک اور گول کیا اور یوں مقابلہ 7-1 سے اپنے نام کر لیا۔
بھارت کی جانب سے ابھیشیک نے دو گول اسکور کیے، جبکہ سکھجیت سنگھ، ہرمن پریت سنگھ، ہاردک سنگھ، جگر اج سنگھ اور دلپریت سنگھ نے ایک، ایک گول کر کے ٹیم کی بڑی کامیابی میں اہم کردار ادا کیا۔ پاکستان کی جانب سے واحد گول ابو محمود نے اسکور کیا۔
اس شکست کے بعد پاکستان کی ایف آئی ایچ پرو لیگ میں مسلسل ناکامیوں کی تعداد 15 ہو گئی ہے، جبکہ قومی ٹیم اب تک ایونٹ میں کوئی پوائنٹ حاصل نہیں کر سکی۔
پاکستان اپنا آخری میچ 27 جون کو میزبان انگلینڈ کے خلاف کھیلے گا، جہاں گرین شرٹس ایونٹ کا اختتام بہتر کارکردگی کے ساتھ کرنے کی کوشش کریں گے۔
