راولپنڈی: چیف آف آرمی اسٹاف اور چیف آف ڈیفنس فورسز سید عاصم منیر سے لیبیا عرب مسلح افواج کے ڈپٹی کمانڈر اِن چیف صدام خلیفہ حفتر نے جنرل ہیڈ کوارٹرز (جی ایچ کیو) راولپنڈی میں ملاقات کی، جس میں باہمی دفاعی تعاون، علاقائی سلامتی اور عسکری روابط کے فروغ پر تفصیلی تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق معزز مہمان کی جی ایچ کیو آمد پر تینوں مسلح افواج کے چاق و چوبند دستے نے انہیں گارڈ آف آنر پیش کیا۔
ملاقات کے دوران دونوں رہنماؤں نے باہمی دلچسپی کے امور، خطے کی سکیورٹی صورتحال، دفاعی تعاون اور عسکری سطح پر روابط کو مزید وسعت دینے کے امکانات کا جائزہ لیا۔ فریقین نے اس بات پر اتفاق کیا کہ پیشہ ورانہ فوجی تربیت، سکیورٹی تعاون اور دفاعی شعبے میں اشتراک کو مزید مضبوط بنانا دونوں ممالک کے مفاد میں ہے۔
اس موقع پر فیلڈ مارشل سید عاصم منیر نے دوست ممالک کے ساتھ امن، استحکام اور تعمیری تعلقات کے فروغ کے لیے پاکستان کے عزم کا اعادہ کیا۔ انہوں نے کہا کہ پاکستان علاقائی اور عالمی امن کے قیام کے لیے تعاون اور شراکت داری کی پالیسی پر کاربند ہے۔
لیبیائی وفد کے سربراہ لیفٹیننٹ جنرل صدام خلیفہ حفتر نے پاکستان کی مسلح افواج کی پیشہ ورانہ صلاحیتوں اور تربیتی معیار کو سراہتے ہوئے خطے میں امن و استحکام کے لیے پاک فوج کے کردار کی تعریف کی۔
دفاعی ماہرین کے مطابق یہ ملاقات پاکستان اور لیبیا کے درمیان عسکری روابط کے فروغ اور دفاعی شعبے میں تعاون کے نئے مواقع پیدا کرنے کی جانب ایک اہم قدم قرار دی جا رہی ہے، جو مستقبل میں دونوں ممالک کے درمیان سکیورٹی اور تربیتی شراکت داری کو مزید مستحکم بنا سکتا ہے۔
