ابوظبی: امریکی وزیر خارجہ مارکو روبیو دو روزہ خلیجی دورے کے پہلے مرحلے میں متحدہ عرب امارات پہنچ گئے ہیں، جہاں وہ امریکا اور ایران کے درمیان حالیہ مفاہمتی پیش رفت اور خطے کی مجموعی سیکیورٹی صورتحال پر اتحادی ممالک کے ساتھ مشاورت کریں گے۔
عرب میڈیا کے مطابق مارکو روبیو اپنے دورے کے دوران متحدہ عرب امارات، کویت اور بحرین کی اعلیٰ قیادت سے ملاقاتیں کریں گے۔ ان ملاقاتوں کا بنیادی مقصد خلیجی اتحادیوں کو ایران کے ساتھ ہونے والے معاہدے اور اس سے متعلق امریکی پالیسی کے بارے میں اعتماد میں لینا ہے۔
امریکی میڈیا رپورٹس کے مطابق واشنگٹن اس دورے کے ذریعے خلیجی ممالک کو علاقائی سلامتی کے حوالے سے یقین دہانیاں بھی فراہم کرنا چاہتا ہے تاکہ ایران کے ساتھ جاری سفارتی عمل کے باوجود امریکا اور خلیجی شراکت داروں کے درمیان دفاعی تعاون اور اسٹریٹجک شراکت داری مزید مضبوط ہو سکے۔
سفارتی ذرائع کا کہنا ہے کہ ملاقاتوں میں آبنائے ہرمز کی صورتحال، خلیج میں بحری سلامتی، ایران کے جوہری پروگرام، خطے میں جاری کشیدگی اور لبنان سمیت دیگر علاقائی معاملات بھی زیر بحث آئیں گے۔
امریکی وزیر خارجہ کا یہ دورہ ایسے وقت میں ہو رہا ہے جب واشنگٹن اور تہران کے درمیان تکنیکی مذاکرات میں پیش رفت کی اطلاعات سامنے آئی ہیں اور دونوں ممالک کے درمیان ایک وسیع تر معاہدے کی بنیاد رکھنے کی کوششیں جاری ہیں۔
تجزیہ کاروں کے مطابق امریکا خلیجی اتحادیوں کو یہ یقین دلانے کی کوشش کر رہا ہے کہ ایران کے ساتھ جاری سفارتی عمل سے خطے میں امریکی سیکیورٹی عزم متاثر نہیں ہوگا اور واشنگٹن اپنے روایتی اتحادیوں کے ساتھ قریبی تعاون جاری رکھے گا۔
