امریکی صدر ڈونلڈ ٹرمپ کی جانب سے ایران کو دی گئی نئی دھمکیوں کے بعد تہران نے سخت ردعمل ظاہر کرتے ہوئے واشنگٹن کو خبردار کیا ہے کہ وہ اپنے بیانات میں احتیاط برتے۔
ایران کے چیف مذاکرات کار اور پارلیمنٹ کے اسپیکر محمد باقر قالیباف نے امریکا کو متنبہ کرتے ہوئے کہا ہے کہ اسلامی جمہوریہ ایران امریکی دھمکیوں سے مرعوب نہیں ہوگا اور ایرانی مسلح افواج ہر قسم کے جواب کے لیے مکمل طور پر تیار ہیں۔
انہوں نے کہا کہ اگر امریکی دھمکیوں میں واقعی کوئی اثر ہوتا تو واشنگٹن آج مایوسی کی اس صورتحال میں نہ پہنچتا۔ ان کے بقول ایران امریکی دباؤ یا دھمکیوں کو خاطر میں نہیں لاتا اور اپنے قومی مفادات کے تحفظ کے لیے عملی اقدامات پر یقین رکھتا ہے۔
محمد باقر قالیباف کا یہ بیان ایسے وقت میں سامنے آیا ہے جب امریکی صدر ڈونلڈ ٹرمپ نے کہا تھا کہ اگر ایران نے لبنان میں اپنے اتحادی گروہوں کی سرگرمیوں کو نہ روکا تو امریکا دوبارہ سخت کارروائی کر سکتا ہے۔ ٹرمپ نے یہاں تک کہا تھا کہ اگر ضرورت پڑی تو امریکا آبنائے ہرمز پر کنٹرول حاصل کر سکتا ہے۔
ایرانی چیف مذاکرات کار نے واشنگٹن کو مخاطب کرتے ہوئے کہا کہ امریکی حکام کو اپنے بیانات میں محتاط رہنا چاہیے کیونکہ ایرانی مسلح افواج ہر ممکن صورتحال کا جواب دینے کے لیے تیار ہیں۔
انہوں نے مزید کہا کہ اس سے کوئی فرق نہیں پڑتا کہ امریکی حکام کیا کہتے ہیں، ایران اپنے فیصلے اور اقدامات خود کرے گا اور کسی بیرونی دباؤ کو قبول نہیں کرے گا۔
یہ بیانات ایسے وقت میں سامنے آئے ہیں جب سوئٹزرلینڈ میں امریکا اور ایران کے درمیان مذاکرات جاری ہیں اور پاکستان و قطر کی ثالثی میں دونوں فریق اسلام آباد مفاہمتی یادداشت کے تحت مختلف معاملات پر بات چیت کر رہے ہیں۔
سفارتی مبصرین کے مطابق ایک جانب مذاکراتی عمل جاری ہے جبکہ دوسری جانب دونوں ممالک کے رہنماؤں کے سخت بیانات اس عمل کو مزید پیچیدہ بنا سکتے ہیں، تاہم فریقین کی براہ راست بات چیت جاری رہنا کسی بڑی پیش رفت کے امکانات کو بھی زندہ رکھے ہوئے ہے۔
