متحدہ عرب امارات نے ایران جنگ اور فضائی بندشوں کے باعث متاثر ہونے والے غیر ملکی مسافروں کو بڑی سہولت فراہم کرتے ہوئے ویزا مدت ختم ہونے کے باوجود قیام پر عائد جرمانے معاف کرنے اور 30 روزہ خصوصی رعایت دینے کا اعلان کر دیا ہے۔
ابوظہبی میں اماراتی حکام کی جانب سے جاری بیان کے مطابق ایران جنگ اور خطے میں پیدا ہونے والی غیر معمولی صورتحال کے باعث امارات میں پھنس جانے والے مسافروں کے لیے انسانی ہمدردی کی بنیاد پر خصوصی اقدامات کیے گئے ہیں۔
حکام کے مطابق متاثرہ افراد کو 9 جولائی تک بغیر کسی جرمانے کے اپنے ویزا اسٹیٹس کو درست کرانے کی اجازت دی گئی ہے، جبکہ اس رعایت کا اطلاق 10 جون سے 9 جولائی تک ہوگا۔
اعلامیے میں کہا گیا ہے کہ یہ سہولت سیاحتی اور وزٹ ویزا رکھنے والے افراد کے ساتھ ساتھ ان افراد کے لیے بھی دستیاب ہوگی جن کے رہائشی ویزے منسوخ ہو چکے ہیں۔ فضائی آپریشنز میں رکاوٹوں اور سفر میں مشکلات کے باعث اماراتی حکومت نے اضافی وقت دینے کا فیصلہ کیا ہے تاکہ متاثرہ افراد قانونی پیچیدگیوں سے بچ سکیں۔
اماراتی حکام کا کہنا ہے کہ خصوصی رعایت کا مقصد جنگی حالات کے سبب مشکلات کا شکار افراد کو سہولت فراہم کرنا اور انسانی بنیادوں پر ان کی مدد کرنا ہے۔ اس دوران ویزا قوانین پر عملدرآمد کے لیے اضافی مہلت بھی دی گئی ہے تاکہ تمام متاثرہ افراد بغیر جرمانے کے اپنے دستاویزات اور قانونی حیثیت کو درست کر سکیں۔
