وفاقی حکومت نے کفایت شعاری اور ایندھن کی بچت سے متعلق متعدد اہم پابندیاں ختم کرتے ہوئے سرکاری اداروں میں معمول کے انتظامی امور بحال کرنے کا فیصلہ کر لیا ہے۔ کابینہ ڈویژن کی جانب سے جاری نوٹیفکیشن کے مطابق سرکاری دفاتر میں اضافی تعطیل کا خاتمہ کر دیا گیا ہے اور اب تمام وفاقی اداروں میں دوبارہ پانچ روزہ ورکنگ ویک نافذ ہوگا۔
حکومت نے سرکاری گاڑیوں کے لیے ایندھن کی فراہمی میں کی گئی 50 فیصد کٹوتی بھی واپس لے لی ہے جبکہ مختلف محکموں کی 60 فیصد گاڑیوں کو بند رکھنے کا سابقہ فیصلہ بھی منسوخ کر دیا گیا ہے۔ اس کے علاوہ گریڈ 20 اور اس سے اوپر کے افسران کی تنخواہوں سے دو روزہ کٹوتی کی شرط بھی ختم کر دی گئی ہے۔
نوٹیفکیشن کے مطابق سرکاری محکموں کے اخراجات میں 20 فیصد کمی کے فیصلے کو بھی واپس لے لیا گیا ہے۔ اسی طرح وفاقی و صوبائی وزراء، گورنرز، مشیروں اور معاونین خصوصی کے بیرون ملک سرکاری دوروں پر عائد پابندی بھی ختم کر دی گئی ہے۔
حکومت نے سرکاری اور نجی اداروں میں صرف 50 فیصد عملے کے ساتھ کام کرنے کی شرط بھی ختم کر دی ہے، جس کے بعد تمام ادارے اپنی مکمل افرادی قوت کے ساتھ معمول کے مطابق کام کر سکیں گے۔
حکومتی ذرائع کے مطابق یہ فیصلے موجودہ انتظامی ضروریات، معاشی سرگرمیوں اور معمولات زندگی کی مکمل بحالی کے پیش نظر کیے گئے ہیں تاکہ سرکاری نظام کو زیادہ مؤثر اور فعال بنایا جا سکے۔
