نیویارک میں واقع اقوامِ متحدہ کے ہیڈکوارٹرز میں پاکستان کے سابق کپتان شاہد آفریدی نے ایک اہم دورہ کیا، جہاں انہوں نے اقوامِ متحدہ میں پاکستان کے مستقل مندوب عاصم افتخار احمد کی دعوت پر مختلف سرگرمیوں میں شرکت کی۔ اس موقع پر انہیں اقوامِ متحدہ کے کردار، عالمی امن کے فروغ کے لیے جاری اقدامات اور ادارے کی مختلف سرگرمیوں کے بارے میں تفصیلی بریفنگ دی گئی۔
دورے کے دوران پاکستان کے مستقل مندوب عاصم افتخار احمد نے شاہد آفریدی کی قومی اور بین الاقوامی سطح پر کرکٹ کے میدان میں خدمات کو خراجِ تحسین پیش کیا۔ انہوں نے اس بات پر زور دیا کہ کھیل مختلف قوموں اور ثقافتوں کے درمیان روابط مضبوط بنانے، خیرسگالی کو فروغ دینے اور بین الاقوامی تعاون کے لیے ایک مؤثر ذریعہ ثابت ہو سکتا ہے۔ ان کا کہنا تھا کہ کھیل نوجوان نسل کو مثبت سرگرمیوں کی طرف راغب کرنے اور عالمی سطح پر امن کے پیغام کو عام کرنے میں اہم کردار ادا کرتے ہیں۔
ملاقات کے دوران شاہد آفریدی کی فلاحی اور سماجی خدمات کا بھی ذکر کیا گیا، جن کے ذریعے وہ کئی برسوں سے تعلیم، صحت اور انسانی بہبود کے مختلف منصوبوں میں اپنا کردار ادا کر رہے ہیں۔ اقوامِ متحدہ میں موجود پاکستانی مشن کے حکام نے ان کی سماجی سرگرمیوں کو پاکستان کے مثبت تشخص کے فروغ میں معاون قرار دیا۔
اس موقع پر شاہد آفریدی نے اقوامِ متحدہ میں پاکستان مشن کی جانب سے پرتپاک استقبال اور میزبانی پر شکریہ ادا کیا۔ انہوں نے عالمی فورم پر پاکستان کی سفارتی کوششوں اور بین الاقوامی امور میں اس کے تعمیری کردار کو سراہتے ہوئے کہا کہ دنیا کو درپیش چیلنجز سے نمٹنے کے لیے مکالمے، تعاون اور باہمی احترام کی ضرورت پہلے سے کہیں زیادہ بڑھ چکی ہے۔
شاہد آفریدی نے اس امید کا اظہار بھی کیا کہ کھیل، ثقافت اور عوامی روابط کے ذریعے مختلف ممالک کے درمیان فاصلے کم کیے جا سکتے ہیں اور نوجوان نسل کو امن، رواداری اور مثبت اقدار کی جانب راغب کیا جا سکتا ہے۔ ان کا کہنا تھا کہ کھیل صرف مقابلے کا نام نہیں بلکہ یہ مختلف قوموں کو قریب لانے اور مشترکہ انسانی اقدار کو فروغ دینے کا ایک مؤثر ذریعہ بھی ہیں۔
