تل ابیب: اسرائیل کی فوج نے دعویٰ کیا ہے کہ گزشتہ 48 گھنٹوں کے دوران جنوبی لبنان میں حزب اللہ سے متعلق تقریباً 150 مقامات کو نشانہ بنایا گیا ہے۔
اسرائیلی فوج کی جانب سے جاری بیان میں کہا گیا کہ ہفتے کے اختتام پر کی جانے والی کارروائیوں میں اسلحہ ڈپو، کمانڈ سینٹرز، راکٹ لانچنگ مقامات اور حزب اللہ کے دیگر عسکری ٹھکانوں کو ہدف بنایا گیا۔
فوج کے مطابق نشانہ بنائے گئے مقامات مبینہ طور پر اسرائیلی افواج کے خلاف حملوں کی منصوبہ بندی اور کارروائیوں کے لیے استعمال ہو رہے تھے۔ بیان میں دعویٰ کیا گیا کہ ان حملوں کا مقصد شمالی سرحد پر درپیش سکیورٹی خطرات کو کم کرنا اور حزب اللہ کی عسکری صلاحیتوں کو محدود کرنا ہے۔
جنوبی لبنان میں اسرائیلی فضائی اور ڈرون حملوں میں حالیہ ہفتوں کے دوران نمایاں اضافہ دیکھا گیا ہے، جس کے باعث خطے میں کشیدگی برقرار ہے۔ دوسری جانب حزب اللہ اور لبنانی حکام کی جانب سے اسرائیلی دعوؤں پر فوری ردِعمل سامنے نہیں آیا۔
مبصرین کے مطابق غزہ جنگ اور خطے میں جاری کشیدگی کے تناظر میں اسرائیل اور حزب اللہ کے درمیان محاذ آرائی مشرقِ وسطیٰ کی مجموعی سکیورٹی صورتحال پر اثرانداز ہو رہی ہے، جبکہ بین الاقوامی برادری دونوں فریقوں سے تحمل اور کشیدگی میں کمی کی اپیل کر رہی ہے۔
