روس کی نوجوان ٹینس اسٹار Mirra Andreeva نے فرینچ اوپن 2026 کے ویمنز سنگلز فائنل میں شاندار کارکردگی کا مظاہرہ کرتے ہوئے پولینڈ کی Maja Chwalinska کو شکست دے کر اپنا پہلا رولینڈ گیروس ٹائٹل جیت لیا۔
اس کامیابی کے ساتھ عالمی رینکنگ میں آٹھویں نمبر پر موجود میرا اینڈریوا 1992 کے بعد فرینچ اوپن ویمنز سنگلز ٹائٹل جیتنے والی کم عمر ترین کھلاڑی بن گئی ہیں۔ اس سے قبل یہ اعزاز Monica Seles کے پاس تھا، جنہوں نے 1992 میں رولینڈ گیروس کا ٹائٹل اپنے نام کیا تھا۔
رولینڈ گیروس میں کھیلے گئے فائنل مقابلے میں 19 سالہ میرا اینڈریوا نے عمدہ کھیل پیش کرتے ہوئے اپنی حریف کو مسلسل دو سیٹس میں 3-6 اور 2-6 سے شکست دی اور چیمپئن شپ اپنے نام کر لی۔
دوسری جانب پولینڈ کی ماجا چوالنسکا نے بھی ٹورنامنٹ میں غیرمعمولی کارکردگی دکھائی۔ عالمی درجہ بندی میں 114ویں پوزیشن رکھنے والی ماجا نے مرکزی مقابلوں میں جگہ بنانے کے لیے تین مسلسل کوالیفائنگ میچز جیتے اور پھر شاندار کھیل کے ذریعے فائنل تک رسائی حاصل کی۔
24 سالہ ماجا چوالنسکا فرینچ اوپن ویمنز سنگلز فائنل تک پہنچنے والی پہلی ایسی کوالیفائر کھلاڑی بنیں جنہوں نے مسلسل نو میچز جیت کر یہ سنگ میل عبور کیا۔
ٹینس ماہرین کے مطابق میرا اینڈریوا کی یہ کامیابی خواتین ٹینس میں ایک نئے دور کی شروعات ثابت ہو سکتی ہے، جبکہ ماجا چوالنسکا کی کارکردگی بھی مستقبل کے لیے ایک مضبوط اشارہ سمجھی جا رہی ہے۔
