اسلام آباد: پاکستان فینسنگ فیڈریشن نے اعلان کیا ہے کہ قومی ٹیم بھارت میں ہونے والی ایشین فینسنگ چیمپئن شپ میں شرکت نہیں کرے گی۔ فیڈریشن کے مطابق بھارتی حکام کی جانب سے کلیئرنس اور ویزوں کے حوالے سے واضح یقین دہانی نہ ملنے کے باعث یہ فیصلہ کیا گیا ہے۔
پاکستان فینسنگ فیڈریشن کے سیکریٹری عثمان احمد نے میڈیا سے گفتگو کرتے ہوئے تصدیق کی کہ قومی کھلاڑیوں اور آفیشلز کو نئی دہلی میں منعقد ہونے والی چیمپئن شپ کے لیے نہیں بھیجا جائے گا۔
انہوں نے بتایا کہ ایونٹ کے منتظمین کی جانب سے بھارتی حکومت سے کلیئرنس اور ویزوں کی فراہمی کی کوئی باضابطہ گارنٹی نہیں دی گئی، جس کے باعث پاکستان نے ٹورنامنٹ میں شرکت سے گریز کا فیصلہ کیا ہے۔
عثمان احمد کے مطابق دیگر ممالک کے کھلاڑیوں اور آفیشلز کو کلیئرنس سے متعلق دستاویزات فراہم کی جا چکی ہیں، تاہم پاکستانی دستے کے حوالے سے صورتحال غیر واضح رہی۔ انہوں نے کہا کہ پاکستان فینسنگ فیڈریشن نے بھارتی فینسنگ ایسوسی ایشن اور آرگنائزنگ کمیٹی سے دو مرتبہ رابطہ کیا اور ضروری اجازت ناموں کے بارے میں استفسار کیا، لیکن مطلوبہ یقین دہانی نہیں کرائی گئی۔
انہوں نے مزید کہا کہ جب تک پاکستانی دستے کے لیے کلیئرنس اور ویزا سہولتوں کی باضابطہ تصدیق نہیں کی جاتی، اس وقت تک فیڈریشن سفر کے لیے دستاویزات جمع نہیں کرائے گی۔
واضح رہے کہ ایشین فینسنگ چیمپئن شپ 18 سے 24 جون تک نئی دہلی میں منعقد ہونا شیڈول ہے، جہاں ایشیا بھر سے نامور فینسرز کی شرکت متوقع ہے۔ پاکستان کی عدم شرکت سے قومی فینسنگ ٹیم کو اہم بین الاقوامی مقابلوں میں قیمتی تجربہ حاصل کرنے کا موقع نہیں مل سکے گا۔
