بلوچستان کے ساحلی ضلع گوادر میں نامعلوم مسلح افراد نے 4 پولیس اہلکاروں کو سرکاری گاڑی سمیت اغوا کر لیا، جس کے بعد علاقے میں سیکیورٹی فورسز اور پولیس کی جانب سے وسیع پیمانے پر سرچ آپریشن شروع کر دیا گیا ہے۔
پولیس حکام کے مطابق واقعہ گوادر کے علاقے کنٹانی میں پیش آیا، جہاں پولیس اہلکار غیر قانونی طور پر ایران جانے والے افراد کے خلاف کارروائی کر رہے تھے۔ گرفتار افراد کو تھانے منتقل کرنے کے دوران مسلح افراد نے پولیس ٹیم کو نشانہ بنایا اور چاروں اہلکاروں کو گاڑی سمیت اپنے ساتھ لے گئے۔
سینئر سپرنٹنڈنٹ آف پولیس (ایس ایس پی) گوادر عطاء الرحمان نے واقعے کی تصدیق کرتے ہوئے بتایا کہ مغوی اہلکار غیر قانونی سرحدی نقل و حرکت کے خلاف کارروائی میں مصروف تھے۔ انہوں نے کہا کہ اغوا کاروں کی تلاش اور مغوی اہلکاروں کی بحفاظت بازیابی کے لیے فوری طور پر سرچ آپریشن کا آغاز کر دیا گیا ہے۔
پولیس اور دیگر قانون نافذ کرنے والے ادارے مختلف علاقوں میں مشترکہ کارروائیاں کر رہے ہیں جبکہ واقعے کے حوالے سے مزید تحقیقات بھی جاری ہیں۔ حکام کا کہنا ہے کہ مغوی اہلکاروں کی بازیابی اور ملزمان کی گرفتاری کے لیے تمام دستیاب وسائل بروئے کار لائے جا رہے ہیں۔
سیکیورٹی ذرائع کے مطابق گوادر اور مکران ڈویژن کے بعض علاقوں میں غیر قانونی سرحدی نقل و حرکت اور جرائم پیشہ عناصر کی سرگرمیوں کے باعث سیکیورٹی چیلنجز موجود ہیں، تاہم قانون نافذ کرنے والے ادارے صورتحال پر قابو پانے کے لیے مسلسل کارروائیاں کر رہے ہیں۔
