اسلام آباد: ایران کے سفیر ڈاکٹر رضا امیری مقدم نے گورنر ہاؤس اسلام آباد میں گورنر خیبرپختونخوا فیصل کریم کنڈی سے ملاقات کی، جس میں خطے کی موجودہ صورتحال، پاک ایران تعلقات، تجارتی تعاون، علاقائی امن اور باہمی دلچسپی کے مختلف امور پر تفصیلی تبادلہ خیال کیا گیا۔
ملاقات کے دوران گورنر خیبرپختونخوا فیصل کریم کنڈی نے کہا کہ ایران اور امریکا کے درمیان کشیدگی کا خاتمہ اور خطے میں پائیدار امن کا قیام وقت کی اہم ضرورت ہے۔ ان کا کہنا تھا کہ عالمی ترقی، خوشحالی اور معاشی استحکام کا انحصار امن پر ہے اور پاکستان ہمیشہ خطے میں امن و استحکام کے فروغ کے لیے مثبت کردار ادا کرتا رہا ہے۔
انہوں نے کہا کہ پاکستان اپنے ہمسایہ اور دیرینہ دوست ملک ایران کی ترقی، استحکام اور خوشحالی کا خواہاں ہے۔ گورنر خیبرپختونخوا نے امید ظاہر کی کہ ایرانی قوم اپنے اتحاد، صبر اور عزم کے ذریعے موجودہ چیلنجز کا کامیابی سے مقابلہ کرے گی۔
فیصل کریم کنڈی نے کہا کہ پاکستان کی عسکری اور سیاسی قیادت عالمی امن کے قیام اور تنازعات کے پرامن حل کے لیے سرگرم کردار ادا کر رہی ہے۔ انہوں نے اس بات پر زور دیا کہ ایران میں امن و استحکام دونوں ممالک کی معاشی ترقی اور علاقائی خوشحالی کے لیے نہایت اہم ہے۔
گورنر خیبرپختونخوا نے پاکستان کے سفارتی کردار کا حوالہ دیتے ہوئے کہا کہ ایران اور امریکا کو مذاکرات کی میز پر لانے کی کوششیں ایک اہم سفارتی کامیابی تصور کی جا سکتی ہیں۔ انہوں نے خیبرپختونخوا اور ایران کے درمیان تجارتی، اقتصادی اور پارلیمانی سطح پر روابط بڑھانے کی ضرورت پر بھی زور دیا اور کہا کہ صوبے میں ایرانی سرمایہ کاری اور تعاون کے وسیع مواقع موجود ہیں۔
اس موقع پر ایرانی سفیر ڈاکٹر رضا امیری مقدم نے پاکستان کے کردار کو سراہتے ہوئے کہا کہ ایرانی عوام اور قیادت پاکستان کی جانب سے اختیار کیے گئے مثبت اور تعمیری مؤقف کو قدر کی نگاہ سے دیکھتے ہیں۔ انہوں نے کہا کہ حالیہ صورتحال میں پاکستان کی سیاسی اور عسکری قیادت نے خطے میں کشیدگی کم کرنے اور استحکام برقرار رکھنے کے لیے اہم کردار ادا کیا ہے۔
ایرانی سفیر نے کہا کہ مستقبل میں پاکستان اور ایران کے درمیان تیل، توانائی اور دیگر تجارتی شعبوں میں تعاون مزید وسعت اختیار کرے گا۔ انہوں نے گوادر، بندر عباس اور کراچی کے درمیان تجارتی روابط مضبوط بنانے اور کاروباری سرگرمیوں میں اضافے کی ضرورت پر زور دیتے ہوئے کہا کہ دونوں ممالک کے درمیان اقتصادی تعاون کے نئے مواقع پیدا ہو رہے ہیں۔
ڈاکٹر رضا امیری مقدم نے اس بات کا بھی اعادہ کیا کہ ایران اپنے قانونی حقوق کے تحفظ کے لیے پرعزم ہے اور خطے میں امن و استحکام کے قیام کا خواہاں ہے۔ انہوں نے کہا کہ پاکستان اور ایران کے درمیان تاریخی، مذہبی اور ثقافتی رشتے موجود ہیں جنہیں مزید مضبوط بنانے کی ضرورت ہے۔
ملاقات کے اختتام پر ایرانی سفیر نے گورنر خیبرپختونخوا فیصل کریم کنڈی کو ایران کے دورے کی دعوت دی۔ بعد ازاں گورنر کی جانب سے ایرانی وفد کے اعزاز میں ظہرانہ بھی دیا گیا۔ اس موقع پر پاکستان پیپلز پارٹی کے مرکزی سیکرٹری اطلاعات ندیم افضل چن اور خیبرپختونخوا اسمبلی میں پارٹی کے پارلیمانی لیڈر احمد کنڈی بھی موجود تھے۔
