منیٰ: سعودی عرب نے حج 2027 کی تیاریوں کا باضابطہ آغاز کرتے ہوئے حجاج کرام کو فراہم کی جانے والی سہولیات اور خدمات کے معیار کو مزید بہتر بنانے کے عزم کا اعادہ کیا ہے۔ سعودی وزیر حج و عمرہ ڈاکٹر توفیق الربیعہ نے منیٰ میں حج کمپنیوں کے نمائندوں سے ملاقات کے دوران آئندہ حج سیزن کی منصوبہ بندی، موجودہ کارکردگی کا جائزہ اور بہتری کے مختلف پہلوؤں پر تفصیلی تبادلہ خیال کیا۔
اجلاس میں وزیر حج و عمرہ نے خادم الحرمین الشریفین سلمان بن عبدالعزیز آل سعود اور ولی عہد و وزیراعظم محمد بن سلمان کی جانب سے حج انتظامات کے لیے فراہم کی جانے والی مسلسل حمایت کو سراہتے ہوئے کہا کہ ان کی سرپرستی کے باعث حجاج کو عالمی معیار کی سہولیات فراہم کرنے میں نمایاں کامیابیاں حاصل ہوئی ہیں۔
ڈاکٹر توفیق الربیعہ نے سپریم حج کمیٹی کے چیئرمین اور سعودی وزیر داخلہ عبدالعزیز بن سعود بن نائف کی نگرانی اور رہنمائی کو بھی خراج تحسین پیش کیا، جس کے نتیجے میں مختلف اداروں کے درمیان مؤثر رابطہ کاری اور آپریشنل کارکردگی میں بہتری آئی۔
انہوں نے اس بات پر زور دیا کہ حج کا نظام مسلسل بہتری اور پیشگی منصوبہ بندی کے اصول پر کام کرتا ہے، اسی لیے اگلے سال کے حج کی تیاریاں موجودہ سیزن کے اختتام سے قبل ہی شروع کر دی گئی ہیں۔ ان کا کہنا تھا کہ گزشتہ حج کے تجربات، کارکردگی کے اشاریے اور حجاج کے اطمینان سے متعلق سرویز آئندہ منصوبہ بندی میں اہم کردار ادا کریں گے۔
اجلاس کے دوران ڈیجیٹل خدمات کی توسیع، معاہداتی نظام میں بہتری، رہائش، نقل و حمل، ہجوم کے انتظام، معاون خدمات اور مجموعی طور پر حجاج کے تجربے کو مزید مؤثر بنانے کے لیے مختلف ترقیاتی تجاویز کا جائزہ لیا گیا۔
سعودی وزیر حج نے کہا کہ مسلسل ترقی اور جدت حجاج کی خدمت کے نظام کا بنیادی ستون ہے اور سعودی حکومت ہر سال حج کے انتظامات کو جدید تقاضوں سے ہم آہنگ بنانے کے لیے اقدامات کر رہی ہے۔
یہ اجلاس سعودی عرب کے وژن 2030 کے تحت جاری "حجاج ایکسپیرینس پروگرام” (Pilgrim Experience Program) کے اہداف کا حصہ ہے، جس کا مقصد دنیا بھر سے آنے والے لاکھوں زائرین کے لیے سفرِ حج کو زیادہ محفوظ، آسان اور روحانی طور پر بہتر بنانا ہے۔
