سابق صدر آزادکشمیر راجہ ذوالقرنین نے اپنے خاندان سمیت پاکستان مسلم لیگ (ن) میں باقاعدہ شمولیت کا اعلان کر دیا ہے۔
پارٹی ذرائع کے مطابق پاکستان مسلم لیگ ن کے ایک اعلیٰ سطحی وفد نے حالیہ دنوں میں راجہ محمد ذوالقرنین خان سے ملاقات کی تھی جس کے دوران انہیں باضابطہ طور پر ن لیگ میں شمولیت کی دعوت دی گئی۔
ملاقات کے بعد راجہ ذوالقرنین خان اور ان کے اہلِ خانہ نے سیاسی مشاورت کے بعد پارٹی میں شمولیت پر رضامندی ظاہر کی تھی، جس کے بعد اب انہوں نے باقاعدہ طور پر مسلم لیگ (ن) میں شمولیت اختیار کر لی ہے۔
اس موقع پر راجہ ذوالقرنین خان نے کہا کہ ان کے شریف خاندان کے ساتھ دیرینہ تعلقات رہے ہیں اور نوازشریف اور شہباز شریف نے پاکستان اور آزاد کشمیر کی ترقی میں اہم کردار ادا کیا ہے۔
واضح رہے کہ راجہ محمد ذوالقرنین خان کا تعلق ضلع بھمبر سے ہے اور وہ آزاد کشمیر کی سیاست میں ایک اہم شخصیت سمجھے جاتے ہیں۔ وہ 2021 کے انتخابات میں پاکستان تحریک انصاف کے امیدوار کی حمایت بھی کر چکے ہیں۔
