امریکی صدر ڈونلڈ ٹرمپ نے ایران کے خلاف جاری کشیدگی اور جنگی صورتحال کی میڈیا کوریج پر شدید ردعمل دیتے ہوئے امریکی میڈیا کو تنقید کا نشانہ بنایا ہے اور بعض رپورٹس کو “امریکا کے ساتھ غداری” قرار دے دیا۔
امریکی صدر نے سوشل میڈیا پر جاری اپنے بیان میں کہا کہ جب “فیک نیوز” یہ تاثر دیتی ہے کہ ایران امریکا کے خلاف مؤثر انداز میں کام کر رہا ہے تو اس سے ایران کو فائدہ پہنچتا ہے اور یہ عمل دراصل دشمن کی حوصلہ افزائی کے مترادف ہے۔
ٹرمپ نے کہا کہ ایسی میڈیا رپورٹس ایران کو “جھوٹی امید” فراہم کرتی ہیں، جو ان کے بقول نہیں ہونی چاہیے۔ انہوں نے امریکی میڈیا کے بعض حلقوں کو “بزدل” قرار دیتے ہوئے الزام لگایا کہ وہ اپنے ہی ملک کی بنیادیں کمزور کر رہے ہیں۔
امریکی صدر کا کہنا تھا کہ “صرف ہارنے والے، نادان اور بے وقوف ہی امریکا کے خلاف بات کر سکتے ہیں”، جبکہ ان کے مطابق امریکا نے ایران کے معاملے میں “اہم کامیابیاں” حاصل کی ہیں۔
Iran اور امریکا کے درمیان حالیہ مہینوں میں کشیدگی میں مسلسل اضافہ دیکھا جا رہا ہے، جبکہ جنگ بندی، آبنائے ہرمز، اقتصادی پابندیوں اور ممکنہ سفارتی مذاکرات کے حوالے سے بیانات بھی عالمی توجہ کا مرکز بنے ہوئے ہیں۔
سیاسی مبصرین کے مطابق ٹرمپ کے حالیہ بیانات امریکا میں میڈیا اور حکومت کے درمیان بڑھتی ہوئی کشیدگی کی عکاسی کرتے ہیں، خاص طور پر ایسے وقت میں جب مشرق وسطیٰ کی صورتحال عالمی سیاست پر گہرے اثرات مرتب کر رہی ہے۔
