کابل: افغان شمالی اتحاد سے وابستہ تنظیم یونائیٹڈ فرنٹ آف افغانستان کے سربراہ جنرل سمیع سادات نے افغان طالبان کے خلاف مسلح کارروائیوں کے آغاز کا اعلان کرتے ہوئے امریکا، نیٹو اور عالمی برادری سے سیاسی حمایت کی اپیل کی ہے۔
سوشل میڈیا پر جاری ایک ویڈیو پیغام میں جنرل سمیع سادات نے کہا کہ ان کی تنظیم نے قندھار سے افغان طالبان کے خلاف اپنی مسلح سرگرمیوں کا آغاز کر دیا ہے۔ ان کے مطابق یہ کارروائیاں طالبان کی حکومت کے خاتمے اور افغانستان میں ایک مختلف سیاسی مستقبل کے قیام کے لیے کی جا رہی ہیں۔
جنرل سمیع سادات نے دعویٰ کیا کہ ان کی افواج صرف افغان طالبان ہی نہیں بلکہ القاعدہ، داعش اور تحریک طالبان پاکستان (TTP) کے خلاف بھی کارروائیاں کر رہی ہیں۔
انہوں نے ہمسایہ ممالک کو مخاطب کرتے ہوئے کہا کہ ان کی تنظیم خطے میں کسی بھی ملک کے لیے مسائل پیدا نہیں کرنا چاہتی اور وہ علاقائی تعاون اور بہتر تعلقات کی خواہاں ہے۔ ان کا کہنا تھا کہ "ہم اپنا مستقبل اپنے ہمسایہ ممالک کے ساتھ دیکھتے ہیں، ہم آپ کے خلاف نہیں بلکہ طالبان کے خلاف ہیں۔”
سمیع سادات نے مزید کہا کہ ان کی فورسز اپنی تمام کارروائیوں میں بین الاقوامی قوانین اور جنگی اصولوں کی پابندی کریں گی اور کسی بھی ملک کی سرزمین کو اپنی سرگرمیوں کے لیے استعمال نہیں کریں گی۔
انہوں نے عالمی برادری، خصوصاً امریکا، نیٹو اور دیگر ممالک سے مطالبہ کیا کہ وہ افغان طالبان کے خلاف سیاسی حمایت فراہم کریں اور افغانستان کے مستقبل کے حوالے سے "تاریخ کے درست رُخ” پر کھڑے ہوں۔
