لاہور: پاکستان علماء کونسل کے چیئرمین حافظ محمد طاہر محمود اشرفی نے سوات میں پیش آنے والے دہشت گرد حملے پر گہرے دکھ اور افسوس کا اظہار کرتے ہوئے قومی سیاسی اور مذہبی قیادت سے دہشت گردی کے خاتمے کے لیے مشترکہ حکمت عملی اختیار کرنے کی اپیل کی ہے۔
اپنے بیان میں طاہر اشرفی نے کہا کہ سوات میں ایک بار پھر پاکستانیوں اور مسلمانوں کا خون بہایا گیا ہے، جس کے بعد یہ وقت آ گیا ہے کہ تمام سیاسی اور مذہبی قیادت اپنے اختلافات سے بالاتر ہو کر ملک میں امن، استحکام اور دہشت گردی کے خاتمے کے لیے متحد ہو جائے۔
انہوں نے کہا کہ مسلسل خونریزی روکنے کے لیے قومی سطح پر مشترکہ لائحہ عمل کی ضرورت ہے تاکہ دہشت گردی کے خلاف مؤثر اور متفقہ اقدامات کیے جا سکیں۔
طاہر اشرفی نے شہداء کے درجات کی بلندی، زخمیوں کی جلد صحت یابی اور پاکستان میں پائیدار امن کے لیے دعا کرتے ہوئے کہا کہ اللہ تعالیٰ وطنِ عزیز پاکستان کو امن کا گہوارہ بنائے۔
ایک علیحدہ بیان میں انہوں نے سعودی عرب کے ولی عہد شہزادہ محمد بن سلمان کی مسلم دنیا کے اتحاد، امتِ مسلمہ کے مشترکہ مفادات کے دفاع اور اسلامی ممالک کے درمیان یکجہتی کے فروغ کے لیے کی جانے والی کوششوں کو سراہا۔
انہوں نے کہا کہ عرب اور اسلامی دنیا کے علماء اور عوام شہزادہ محمد بن سلمان کی مخلصانہ کاوشوں کو قدر کی نگاہ سے دیکھتے ہیں اور مسلم ممالک کے درمیان اتحاد و تعاون کے فروغ کے لیے ان کی کوششوں کی کامیابی کے لیے نیک تمناؤں کا اظہار کرتے ہیں۔
