لاہور: پاکستان علماء کونسل نے ماہِ اگست کے دوران ملک بھر میں "پیغامِ پاکستان” کے عنوان سے خصوصی پروگرامز، سیمینارز اور عوامی اجتماعات منعقد کرنے کا اعلان کیا ہے، جن کا مقصد اسلام کے حقیقی پیغامِ امن، محبت، رواداری اور اعتدال کو عام کرنا ہے۔
پاکستان علماء کونسل کے چیئرمین حافظ محمد طاہر محمود اشرفی نے لاہور میں پاکستان علماء کونسل لاہور کے ذمہ داران سے خطاب کرتے ہوئے کہا کہ "پیغامِ پاکستان” ایک متفقہ قومی دستاویز ہے، جس پر تقریباً 15 ہزار علماء کرام کے علاوہ امامِ کعبہ اور امام مسجد نبویؐ کے بھی دستخط موجود ہیں۔
انہوں نے کہا کہ اس دستاویز کو ملک کے ہر شہری تک پہنچایا جائے گا تاکہ عوام کو یہ آگاہی دی جا سکے کہ اسلام امن، محبت، رواداری اور اعتدال کا دین ہے، نہ کہ تشدد، انتہا پسندی یا نفرت کا۔
حافظ طاہر محمود اشرفی نے کہا کہ اگست کے دوران منعقد ہونے والے پروگرامز کا مقصد معاشرے میں انتہا پسندانہ اور متشددانہ رویوں کے خاتمے کے لیے شعور بیدار کرنا اور قومی یکجہتی کو فروغ دینا ہے۔
انہوں نے مزید اعلان کیا کہ ماہِ ربیع الاول اور ماہِ ربیع الثانی میں بھی "پیغامِ رحمت اللعالمینؐ، پیغامِ امن، محبت اور اعتدال” کے عنوان سے ملک بھر میں عوامی اجتماعات اور کانفرنسوں کا انعقاد کیا جائے گا۔
چیئرمین پاکستان علماء کونسل کے مطابق 30 اگست کو لاہور کے الحمرا ہال میں پیغامِ رحمت اللعالمین کانفرنس منعقد کی جائے گی، جس میں مختلف مکاتبِ فکر کے علماء، مذہبی رہنما اور دیگر اہم شخصیات شرکت کریں گی۔
