مظفرآباد: آزاد جموں و کشمیر قانون ساز اسمبلی کے عام انتخابات 2026 کے دوسرے مرحلے میں مظفرآباد ڈویژن کی 9 اور پاکستان میں مقیم کشمیری مہاجرین کی 12 نشستوں پر آج (اتوار) پولنگ ہوگی۔
الیکشن کمیشن کے مطابق پولنگ کا عمل صبح 8 بجے شروع ہوگا اور شام 5 بجے تک بغیر کسی وقفے کے جاری رہے گا۔ اس سلسلے میں انتخابی سامان کی ترسیل اور پولنگ عملے کی تعیناتی کا عمل مکمل کر لیا گیا ہے۔
مظفرآباد ڈویژن کے تین اضلاع مظفرآباد، نیلم اور جہلم ویلی کے 9 انتخابی حلقوں میں 8 لاکھ 90 ہزار 621 رجسٹرڈ ووٹرز اپنا حق رائے دہی استعمال کریں گے۔
شفاف اور پرامن انتخابات کے انعقاد کے لیے مظفرآباد ڈویژن بھر میں 1,483 پولنگ اسٹیشن قائم کیے گئے ہیں، جبکہ 9 نشستوں پر 208 امیدوار مدمقابل ہیں۔ امیدواروں میں پاکستان پیپلز پارٹی، پاکستان مسلم لیگ (ن)، استحکام پاکستان پارٹی سمیت دیگر سیاسی جماعتوں اور آزاد امیدوار شامل ہیں۔
دوسری جانب پاکستان کے مختلف شہروں میں مقیم کشمیری مہاجرین بھی اپنی 12 مخصوص نشستوں کے لیے ووٹ ڈالیں گے۔ ان نشستوں میں جموں کی 6 نشستیں (LA-34 سے LA-39) اور ویلی کی 6 نشستیں (LA-40 سے LA-45) شامل ہیں۔
آزاد کشمیر کے چیف الیکشن کمشنر جسٹس (ر) غلام مصطفیٰ مغل نے کہا ہے کہ سیکیورٹی وجوہات کی بنا پر انتخابات مرحلہ وار کرائے جا رہے ہیں۔ ان کے مطابق گزشتہ روز مظفرآباد میں صورتحال غیر یقینی تھی، تاہم آج امن و امان کی صورتحال پہلے کے مقابلے میں بہتر ہے اور الیکشن کے پرامن انعقاد کے لیے تمام انتظامات مکمل کر لیے گئے ہیں۔
انتخابی عمل کے دوران سیکیورٹی کے سخت انتظامات کیے گئے ہیں تاکہ ووٹرز بلا خوف و خطر اپنا حق رائے دہی استعمال کر سکیں۔
