قاہرہ: ایران کے وزیر خارجہ عباس عراقچی نے امریکہ کو کسی بھی ممکنہ "مہم جوئی” یا "جارحیت” سے خبردار کرتے ہوئے کہا ہے کہ تہران ہر قسم کی کارروائی کا فیصلہ کن جواب دینے کے لیے مکمل طور پر تیار ہے۔
ایرانی وزیر خارجہ کے سرکاری ٹیلی گرام اکاؤنٹ کے مطابق عباس عراقچی نے ترک ہم منصب اور پاکستان کے آرمی چیف کے ساتھ الگ الگ ٹیلیفونک رابطوں میں خطے کی تازہ صورتحال، علاقائی سلامتی اور ممکنہ خطرات پر تبادلہ خیال کیا۔
عباس عراقچی نے گفتگو کے دوران اس بات پر زور دیا کہ ایران کسی بھی بیرونی جارحیت یا اشتعال انگیز اقدام کا مؤثر اور مضبوط جواب دینے کی مکمل صلاحیت رکھتا ہے۔
بیان میں کہا گیا کہ ایران خطے میں کشیدگی بڑھانے والے اقدامات کی مخالفت کرتا ہے اور امریکہ کو خبردار کرتا ہے کہ وہ کسی بھی قسم کی "مہم جوئی” سے گریز کرے، کیونکہ ایسے اقدامات کے نتائج خطے کے امن و استحکام پر منفی اثرات مرتب کر سکتے ہیں۔
ایرانی وزیر خارجہ نے کہا کہ تہران اپنی قومی سلامتی اور خودمختاری کے تحفظ کے لیے ہر ضروری اقدام اٹھانے کا حق محفوظ رکھتا ہے اور کسی بھی ممکنہ جارحیت کا مناسب اور فیصلہ کن جواب دیا جائے گا۔
یہ بیان ایسے وقت سامنے آیا ہے جب مشرق وسطیٰ میں سکیورٹی صورتحال بدستور حساس ہے اور ایران و امریکہ کے درمیان کشیدگی کے حوالے سے مختلف سفارتی رابطے جاری ہیں۔
