شمالی وزیرستان کے علاقے رزمک میں سکیورٹی فورسز نے انٹیلی جنس اطلاعات کی بنیاد پر کامیاب آپریشن کرتے ہوئے پانچ دہشت گردوں کو ہلاک کر دیا، جبکہ شدید فائرنگ کے تبادلے میں پاک فوج کے میجر حافظ احسان الٰہی شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق یکم اگست 2026 کو رزمک میں انٹیلی جنس بیسڈ آپریشن اس اطلاع پر کیا گیا کہ بھارتی سرپرستی میں سرگرم دہشت گرد علاقے میں موجود ہیں۔ آپریشن کے دوران سکیورٹی فورسز نے مؤثر کارروائی کرتے ہوئے پانچ دہشت گردوں کو ہلاک کر دیا۔
آئی ایس پی آر کے مطابق آپریشن کے دوران دہشت گردوں کے ساتھ شدید فائرنگ کا تبادلہ ہوا، جس میں جوانوں کی اگلے مورچوں سے قیادت کرنے والے 34 سالہ میجر حافظ احسان الٰہی نے بہادری سے لڑتے ہوئے جامِ شہادت نوش کیا۔ شہید افسر کا تعلق ضلع میانوالی سے تھا۔
بیان میں کہا گیا ہے کہ ہلاک ہونے والے دہشت گرد سکیورٹی فورسز، قانون نافذ کرنے والے اداروں اور معصوم شہریوں پر ہونے والے متعدد دہشت گرد حملوں میں ملوث تھے۔ کارروائی کے دوران ان کے قبضے سے اسلحہ اور گولہ بارود بھی برآمد کر لیا گیا۔
آئی ایس پی آر کے مطابق علاقے میں موجود دیگر دہشت گرد عناصر کی تلاش اور خاتمے کے لیے کلیئرنس آپریشن جاری ہے۔ بیان میں کہا گیا کہ وفاقی ایپکس کمیٹی کے منظور کردہ قومی ایکشن پلان اور "عزمِ استحکام” وژن کے تحت دہشت گردی کے خلاف کارروائیاں پوری شدت کے ساتھ جاری رہیں گی۔
پاک فوج نے اس عزم کا اعادہ کیا کہ پاکستان کی سکیورٹی فورسز اور قانون نافذ کرنے والے ادارے غیر ملکی سرپرستی میں ہونے والی دہشت گردی کے مکمل خاتمے تک اپنی کارروائیاں جاری رکھیں گے۔ آئی ایس پی آر کے مطابق وطن کے دفاع کے لیے بہادر جوانوں کی قربانیاں دہشت گردی کے خلاف قومی عزم کو مزید مضبوط بناتی ہیں۔
