راولپنڈی: چیف آف ڈیفنس فورسز فیلڈ مارشل سید عاصم منیر نے کہا ہے کہ پاکستان اور چین کی لازوال دوستی وقت کی ہر کسوٹی پر پوری اتری ہے اور دونوں ممالک کے درمیان اسٹریٹیجک شراکت داری بدلتے ہوئے علاقائی اور عالمی حالات میں مزید مضبوط ہو رہی ہے۔
پاک فوج کے شعبہ تعلقاتِ عامہ (آئی ایس پی آر) کے مطابق چین کی پیپلز لبریشن آرمی (PLA) کے قیام کی 99ویں سالگرہ کے موقع پر جنرل ہیڈ کوارٹرز (جی ایچ کیو) راولپنڈی میں ایک پروقار تقریب کا انعقاد کیا گیا، جس میں پاکستان میں چین کے سفیر جیانگ زائی ڈونگ نے بطور مہمانِ خصوصی شرکت کی۔
تقریب میں چین کے دفاعی اتاشی میجر جنرل وانگ ژونگ، چینی سفارت خانے کے اعلیٰ حکام اور پاکستان کی تینوں مسلح افواج کے سینئر افسران بھی شریک ہوئے۔
اس موقع پر خطاب کرتے ہوئے فیلڈ مارشل سید عاصم منیر نے معزز مہمانوں کا خیرمقدم کیا اور پیپلز لبریشن آرمی کو اس کے 99ویں یومِ تاسیس پر مبارک باد پیش کی۔ انہوں نے چین کی دفاعی صلاحیت، قومی ترقی اور عالمی امن و سلامتی کے فروغ میں پی ایل اے کے کردار کو سراہتے ہوئے کہا کہ پاک چین تعلقات باہمی اعتماد، احترام اور دیرینہ دوستی پر استوار ہیں۔
انہوں نے کہا کہ پاکستان اور چین کی دوستی نہ صرف آزمودہ ہے بلکہ خطے اور دنیا کو درپیش چیلنجز کے باوجود مسلسل مضبوط ہو رہی ہے، اور دونوں ممالک مختلف شعبوں میں تعاون کو مزید وسعت دینے کے لیے پرعزم ہیں۔
آئی ایس پی آر کے مطابق پاکستان میں چین کے سفیر جیانگ زائی ڈونگ نے تقریب کے انعقاد پر فیلڈ مارشل سید عاصم منیر کا شکریہ ادا کیا اور دہشت گردی کے خلاف جنگ میں پاکستان کی مسلح افواج کی پیشہ ورانہ خدمات اور قربانیوں کو خراجِ تحسین پیش کیا۔
چینی سفیر نے اس موقع پر پاکستان کی غیر متزلزل حمایت کو سراہتے ہوئے اس عزم کا اعادہ کیا کہ دونوں ممالک کے درمیان اسٹریٹیجک تعاون پر مبنی شراکت داری کو مزید مستحکم بنایا جائے گا اور باہمی مفادات کے مختلف شعبوں میں تعاون کو فروغ دیا جائے گا۔
